Ulttyq bank bazalyq mólsherlemeni 17%-ǵa deıin tómendetti

Bul sheshim kezekti boljamdy raýndtyń nátıjesine, negizgi makroekonomıkalyq kórsetkishter men ınflıatsııa táýekelderi teńgeriminiń jańartylǵan baǵalaýyna súıenip qabyldandy.

- Jyldyq ınflıatsııanyń baıaýlaý úrdisi jalǵasyp keledi: Ótken jylǵy qyrkúıektegi eń joǵary mán – 12,9%-dan 2,5 paıyzdyq tarmaqqa tómendep, bıylǵy mamyr aıynyń qorytyndysy boıynsha 10,4% boldy.

Azyq-túlik ınflıatsııasy 10,7%-ǵa deıin tómendedi. Buǵan jemis-jıdek pen kókónis, áleýmettik mańyzy bar azyq-túlik taýarlary men jekelegen ımporttyq taýarlar baǵasy ósiminiń baıaýlaýy sebep boldy.

Azyq-túlikke jatpaıtyn ınflıatsııanyń ósý qarqyny (11,7%) burynǵy deńgeıinde saqtaldy. Bul baǵytqa teńge baǵamynyń nyǵaıýy men tutynýshylyq kredıtteýdiń báseńdeýi saldarynan suranystyń turaqtaný belgileri áser etti, - delingen aqparatta.

Kórsetiletin qyzmetter baǵasynyń ósýi de suranystyń turaqtanýy men turǵyn úı-kommýnaldyq qyzmet tarıfteri ósiminiń báseńdeýinen baıaýlap, 8,7%-dy qurady.

Mamyr aıynda aılyq ınflıatsııa 0,7%-ǵa deıin baıaýlady (sáýirde – 0,8%). Bazalyq jáne maýsymdyq faktorlar eskerilmegen ınflıatsııa da 0,7%-ǵa deıin tómendedi.

Halyqtyń aldaǵy bir jylǵa arnalǵan ınflıatsııalyq kútýleri mamyrda 12,7% boldy. Sońǵy eki aıda bul kórsetkish 12,4-12,7% aralyǵynda qalyptasty. Al ótken jyldyń ortasynan beri ol turaqty túrde 13-14%-dan joǵary bolǵan edi. Qazirgi kútýlerdiń edáýir bóligi retteletin baǵalar reformasynyń yqpalymen qalyptasyp otyr. Al, naryqqa kásibı qatysýshylardyń 2026 jyldyń sońyna qaraı ınflıatsııa boıynsha kútýleri 10,0% deńgeıinde ózgerissiz qaldy.

Azyq-túliktiń álemdik baǵasy – ósimdik maıy, et jáne dándi daqyldardyń qymbattaýy esebinen birqalypty ósip jatyr, al qant pen sút ónimderiniń baǵasy tómendep otyr.

- Reseı Federatsııasynda da ınflıatsııanyń baıaýlaý belgileri baıqalady. EO men AQSh-ta energııa kózderi baǵasynyń joǵary saqtalýyna baılanysty dezınflıatsııa protsesi toqtap qaldy. Osyǵan oraı, jetekshi ortalyq bankter aqsha-kredıt saıasatyn saqtyqpen júrgizip otyr jáne ony kez kelgen ýaqytta túzetýge daıyn ekenin baıqatty.

Jańartylǵan bazalyq stsenarıı aıasynda aldyńǵy boljamdarmen salystyrǵanda, osy jyldyń sońyna deıin Brent markaly munaıdyń baǵasy neǵurlym joǵary deńgeı – 1 barrel úshin 90 AQSh dollary kóleminde bolady dep boljanady. Munaı baǵasynyń mundaı dınamıkasy Taıaý Shyǵystaǵy geosaıası shıelenistiń áserinen qalyptasyp otyr. Boljam boıynsha baǵa birtindep tómendep, 2027 jyly barreline 75 AQSh dollaryn, al 2028 jyly 65 AQSh dollaryn quramaq, - dep jazdy Ulttyq bankten.

2026 jylǵa arnalǵan ınflıatsııa boljamy 9-11%-ǵa deıin (buǵan deıin 9,5-11,5%) tómendeý jaǵyna qaraı qaıta qaraldy. Buǵan baǵa ósiminiń is júzinde tez baıaýlaýy, QQS kóterilýiniń baǵaǵa shekteýli áseri, sondaı-aq teńge baǵamynyń nyǵaıýy birden-bir sebep boldy.

Ulttyq bank bıyl ınflıatsııanyń bir mándi deńgeıge tómendeýin kútedi. Buǵan ustamdy qatań aqsha-kredıt sharttary men Úkimetpen birlesip atqarylyp jatqan makroekonomıkalyq turaqtylyqty qamtamasyz etý sharalary septigin tıgizedi. Boljam boıynsha, 2027 jyly ınflıatsııa 5,5-7,5%-ǵa deıin baıaýlaıdy, al 2028 jyly 5%-dyq nysanaly kórsetkishke deıinturaqtanady. Ol syrtqy ınflıatsııalyq jaǵdaıdyń qalypqa kelýine, ınflıatsııalyq kútýlerdiń tómendeýine, kvazıfıskaldyq yntalandyrýdyń jáne fıskaldyq shoǵyrlandyrýdyń azaıýy aıasynda oryn alady.

Inflıatsııa táýekelderiniń proınflıatsııalyq baǵytqa qaraı yǵysý dárejesi tómendedi. Birinshi jartyjyldyqtaǵy birqalypty ishki suranys pen teńgeniń nyǵaıýyna yqpal etken qolaıly syrtqy konıýnktýra jınaqtalǵan proınflıatsııalyq qysymdy ishinara teńestirdi.

Іshki táýekelder: Kvazıfıskaldyq yntalandyrý aıasynda suranystyń jedel ósýi, aqsha agregattarynyń keńeıýi, qubylmaly ınflıatsııalyq kútýler, sondaı-aq TKQ tarıfteri men JJM baǵalaryn reformalaý parametrleriniń naqty iske asýy.

Syrtqy táýekelder: Syrtqy ınflıatsııalyq qysymdy kúsheıtetin jáne álemdik naryqtaǵy qubylmalylyqty arttyratyn geosaıası shıelenister.

2026 jylǵa arnalǵan JІÓ-niń ósý boljamy jaqsaryp, 4,5-5,5% aralyǵynda baǵalandy. Boljam naqty ekonomıkalyq belsendiliktiń joǵarylaýy men munaı baǵasyndaǵy alǵysharttardyń jaqsarýyna baılanysty qaıta qaraldy. 2027-2028 jyldary JІÓ ósimi 3,5-4,5% deńgeıinde bolady dep kútiledi. Ortamerzimdi keleshekte ekonomıkadaǵy ósim ishki suranystyń neǵurlym teńgerimdi dınamıkasy men munaı baǵasynyń tómendeýi jaǵdaıynda qalyptasady.

- Qol jetkizilgen ınflıatsııanyń baıaýlaýy men boljamdardyń jaqsarýyna baılanysty osy otyrysta bazalyq mólsherlemeni tómendetý múmkindigi qalyptasty. Sonymen birge, bıyl ınflıatsııanyń bir mándi kórsetkishke deıin tómendeýin qamtamasyz etý jáne ortamerzimdi keleshektegi maqsatqa qol jetkizý úshin aqsha-kredıt sharttarynyń ustamdy qatańdyǵyn saqtaý qajet. Budan keıingi sheshimder ınflıatsııanyń naqty traektorııasyna, ishki suranys dınamıkasyna, fıskaldyq parametrlerdiń oryndalýyna jáne kvazıfıskaldyq yntalandyrýdyń áserine súıene otyryp qabyldanady, - delingen qarjy uıymynyń dereginde.

Qabyldanǵan sheshimge túrtki bolǵan faktorlar men boljamdar týraly tolyq aqparat 2026 jylǵy 10 maýsymda Ulttyq Banktiń resmı ınternet-resýrsynda jarııalanatyn Aqsha-kredıt saıasaty týraly baıandamada beriledi. Ulttyq banktiń Aqsha-kredıt saıasaty komıtetiniń bazalyq mólsherleme boıynsha kezekti josparly sheshimi 2026 jylǵy 24 shildede Astana qalasynyń ýaqytymen saǵat 12:00-de jarııalanady.

Aıta keteıik, Ulttyq bank ekinshi toqsanda bıznes pen ıpotekaǵa suranys artatynyn habarlady.