Ulttyq bank bazalyq mólsherlemeni 16,75% deńgeıinde belgiledi
ASTANA. KAZINFORM — Ulttyq banktiń Aqsha-kredıt saıasaty komıteti bazalyq mólsherlemeni +/-1 p. t. dálizimen jyldyq 16,75% deńgeıinde belgileý týraly sheshim qabyldady.
— Jyldyq ınflıatsııa toǵyz aı boıy tómendep, mamyrdaǵy 10,4%-dan maýsym aıynda 10,3% boldy. Azyq-túlik ınflıatsııasy 10,7%-dan 10,4%-ǵa deıin tómendedi. Azyq-túlikke jatpaıtyn ınflıatsııa 11,7% deńgeıinde saqtaldy. Retteletin kommýnaldyq qyzmetter baǵasynyń jyldyq tómendeýi kezinde rettelmeıtin qyzmetterdiń qymbattaýy aıasynda qyzmetter ınflıatsııasy 9,0% (mamyrda — 8,7%) kórsetti.
Aılyq ınflıatsııa maýsym aıynda 0,8%, al bazalyq ınflıatsııanyń maýsymdyq faktorlar eskerilmegen baǵalaý medıanasy 0,9% boldy. Qazirgi dınamıka dezınflıatsııalyq ımpýlstiń álsiregenin kórsetýi múmkin, alaıda ınflıatsııanyń dınamıkasynda baıqalatyn úrdister keıingi derektermen rastalýdy qajet etedi, — delingen bank habarlamasynda.
Halyqtyń aldaǵy bir jylǵa ınflıatsııany kútýi maýsym aıynda 13,4% (12,7%) boldy. Bul rette naryqtyń kásibı qatysýshylarynyń 2026 jylǵa boljamy 10,0% deńgeıinde turaqty túrde saqtaldy. Al 2027 jylǵa kútýler tómendeý baǵytynda qaıta qaralyp, 7,8% boldy.
— Syrtqy sektorda belgisizdik áli saqtalyp tur. Taıaý Shyǵystaǵy qaqtyǵystyń qaıtadan ýshyǵýy energııa resýrstarynyń baǵasyn ósirdi. Álemdik azyq-túlik baǵasy ártúrli baǵytta qalyptasyp otyr. Joǵary suranys pen shekteýli usynystyń aıasynda ósimdik maıy men et qymbattaıdy, al dándi daqyldar baǵasy egin bitik shyǵady degen boljamnyń jaqsarýyna baılanysty tómendeıdi dep kútiledi.
Reseıde ınflıatsııa qarqyn alyp tur. Osyǵan baılanysty Reseı banki proınflıatsııalyq táýekelderdiń kúsheıgenin alǵa tartyp, negizgi mólsherlemeni odan ári tómendetýge saqtyq tanytyp otyr. Eýroaımaqta energııa kózderiniń baǵasy ósedi degen boljam keleshek ınflıatsııaǵa qatysty kútýlerdi nasharlatty. Al AQSh-ta ınflıatsııa nysanaly deńgeıden joǵary kúıinde qaldy. Maýsym aıynda EOB negizgi mólsherlemelerdi kóterip, 2023 jyldan beri alǵash ret aqsha-kredıt saıasatyn qatańdatýǵa kóshti. FRJ mólsherlemeni ózgerissiz saqtap, budan keıingi sheshimderdiń kelip túsetin derekterge jáne táýekelder teńgeriminiń ózgerýine baılanysty bolatynyn atap ótti. Bul jahandyq monetarlyq sharttar meılinshe uzaq ýaqyt boıy qatań saqtalatynyn kórsetedi, — delingen habarlamada.
Ekonomıkalyq belsendilik artyp keledi. 2026 jylǵy birinshi jartyjyldyqtyń qorytyndysy boıynsha JІÓ 4,1%-ǵa ósti. Al taý-ken óndirý ónerkásibin esepke almaǵanda, ósim shamamen — 5,3%. Qurylys, óńdeý ónerkásibi men kólik salasynda joǵary qarqyn saqtalýda. Investıtsııalar 9,6%-ǵa deıin jedeldedi. Bıýdjet qarajatyn esepke almaǵanda, shıkizatqa jatpaıtyn sektorǵa ınvestıtsııalardyń ósýi 28,9% boldy.
Aıta ketelik Tımýr Súleımenov bıyl bazalyq mólsherleme 17 paıyzǵa deıin tómendetilgeni týraly aıtqan edi. Ulttyq bank bazalyq mólsherlemeniń tómendeýi teńge baǵamyna áser etpeıtinin aıtqan edi.
