Ulttyq bank bazalyq mólsherlemeni 16,5% deńgeıinde qaldyrdy

ASTANA. KAZINFORM - Qazaqstan Respýblıkasy Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 16,5% deńgeıinde belgileý týraly sheshim qabyldady.

Sheshim qabyldanǵanda naqty derekter, jańartylǵan boljamdardy taldaý men ınflıatsııa táýekelderiniń balansyn baǵalaý kórsetkishteri eskerildi.

Mamyr aıynyń qorytyndysy boıynsha jyldyq ınflıatsııa 11,3%-ǵa jetti. Sońǵy aılarda baǵanyń ósýine túrtki bolǵan negizgi qozǵaýshy faktor – retteletin tarıfter men naryqtyq qyzmetterdiń aıtarlyqtaı qymbattaýyna baılanysty servıstik ınflıatsııa bolyp otyr.

Baǵanyń ósý qarqyny azyq-túlik taýarlary boıynsha da jedeldegeni baıqaldy. Mamyrda aılyq ınflıatsııa tarıhı dınamıkadan aıtarlyqtaı asyp, 0,9% boldy. Bazalyq jáne maýsymdyq áserlerden tazartylǵan ınflıatsııa kórsetkishteri bir jylǵa eseptegende tıisinshe 10,1%-dy jáne 11,4%-dy qurady. Osynyń barlyǵy tutynýshylyq suranystyń qaıta artýynan, óndiris shyǵyndarynyń ósýinen, sondaı-aq fıskaldyq yntalandyrýdyń jalǵasýynan baǵaǵa qysym saqtalyp otyrǵanyn kórsetedi.

Mamyrda halyqtyń ınflıatsııalyq kútýleri sáýirdegi 12,2%-ǵa qaraǵanda 14,1%-ǵa deıin ósti. Bul keleshek ınflıatsııaǵa qatysty qubylmalylyq pen belgisizdik saqtalyp qalǵanyn kórsetedi.

Syrtqy sektor tarapynan da baǵaǵa qysym kúsheıe tústi. Bul Reseıdegi joǵary ınflıatsııanyń saqtalýyna, joǵary suranys pen valıýtalyq aýytqýlar aıasynda álemdik azyq-túlik baǵasynyń óse túsýine, sondaı-aq saýda qaqtyǵystarynyń kúsheıýinen jáne shıkizat taýarlary baǵasynyń qubylmalylyǵynan týyndaǵan joǵary belgisizdikke baılanysty. Jahandyq baǵa ornyqty túrde ósý úrdisinde qaldy. Saýda-sattyqtaǵy shıelenis ınflıatsııalyq táýekelderdi kúsheıtip, ónerkásip pen qyzmet kórsetý sektorynda iskerlik belsendilikti tejeı tústi.

Osy jaǵdaılarda naryq tarapynan saıasatty odan ári jumsartýǵa qatysty kútýler bolǵanymen, ortalyq bankterdiń rıtorıkasy áli de ustamdy qalpyn saqtap otyr.

Osyǵan deıin Ulttyq banktiń Aqsha-kredıt saıasaty komıteti  bazalyq mólsherlemeni +/- 1 paıyzdyq tarmaq dálizimen jyldyq 16,5% deńgeıinde belgileý týraly sheshim qabyldaǵany týraly jazdyq.