Ulttyq bank bazalyq mólsherlemeni 16,25%-ǵa deıin tómendetti
ASTANA. KAZINFORM — Qazaqstan Respýblıkasy Ulttyq Bankiniń Aqsha-kredıt saıasaty komıteti bazalyq mólsherlemeni 16,25%-ǵa deıin tómendetý týraly sheshim qabyldady.
Bazalyq mólsherleme +/- 1 paıyzdyq tarmaq dálizimen jyldyq 16,25% deńgeıinde belgilendi. Ulttyq bank bul sheshimdi boljam raýndynyń qorytyndysy, negizgi makroekonomıkalyq kórsetkishter jáne ınflıatsııa táýekelderiniń jańartylǵan baǵasy negizinde qabyldaǵan.
Ulttyq banktiń málimetinshe, jyldyq ınflıatsııa tamyzda 9,8%-ǵa deıin baıaýlaǵan. Dezınflıatsııalyq protsess qatarynan 11 aı jalǵasyp keledi.
— Azyq-túlik ınflıatsııasy 9,5%-ǵa deıin tómendegen. Buǵan jemis-jıdek pen kókónistiń aıtarlyqtaı arzandaýy jáne ımporttyq taýarlar baǵasynyń tómendeýi áser etken. Azyq-túlikke jatpaıtyn ınflıatsııa 11,4%-ǵa deıin baıaýlasa, servıstik ınflıatsııa 8,9% boldy. Tamyzdaǵy aılyq ınflıatsııa — 0,6%. Halyqtyń aldaǵy bir jylǵa ınflıatsııalyq kútýleri de tómendep, shildede 12,1% boldy. Maýsymda bul kórsetkish 13,4% edi, — delingen habarlamada.
Ulttyq bank 2026 jylǵa ınflıatsııa boljamyn 9-11% deńgeıinde saqtap otyr. Al 2027 jylǵa arnalǵan boljam 6,5-8,5%-ǵa deıin kóterildi. Buǵan syrtqy ınflıatsııanyń ósýi, retteletin baǵalar boıynsha alǵysharttardyń qaıta qaralýy jáne fıskaldyq serpinniń kúsheıýi sebep bolǵan.
Retteýshi bazalyq mólsherlemeni tómendetýge aǵymdaǵy ınflıatsııa men ınflıatsııalyq kútýlerdiń oń dınamıkasy múmkindik bergenin atap ótti. Alaıda proınflıatsııalyq faktorlar men táýekelderdiń kúsheıýine baılanysty mólsherlemeni odan ári tómendetý múmkindigi shekteýli bolady.
Qazaqstan ekonomıkasynyń 2026 jylǵy ósimi 4,5-5,5% deńgeıinde boljanyp otyr. 2027 jyly JІÓ ósimi shamamen 4,5%, al 2028 jyly 4-5% bolady dep kútiledi.
Ulttyq banktiń bazalyq mólsherleme boıynsha kelesi josparly sheshimi 2026 jylǵy 23 qazanda saǵat 12:00–de jarııalanady.
Eske salaıyq, buǵan deıin Ulttyq bank bazalyq mólsherlemeni 16,75% deńgeıinde belgilegenin habarlaǵanbyz.
