Bizdiń sheshim qatań aqsha-kredıt sharttaryn ustap turýdy kózdeıdi – Tımýr Súleımenov

ASTANA. KAZINFORM – Ulttyq banktiń Aqsha-kredıt saıasaty komıteti bazalyq mólsherlemeni 14,25 paıyz deńgeıinde saqtaý týraly sheshim qabyldady. Bul týraly Ulttyq bank tóraǵasy Tımýr Súleımenov aıtty.

«Ulttyq banktiń Aqsha-kredıt saıasaty komıteti bazalyq mólsherlemeni 14,25 paıyz deńgeıinde saqtaý týraly sheshim qabyldady. Bul sheshimdi qabyldaǵanda ınflıatsııanyń dınamıkasy men táýekelder balansy eskerildi. Jyldyq ınflıatsııa shilde aıynda ósken soń tamyz, qyrkúıek aılarynda baıaý tómendeýin jalǵastyrdy. Inflıatsııa bizdiń boljamymyzǵa saı qalyptasyp keledi, alaıda 5 paıyzdyq targetten joǵary bolyp tur. Halyqtyń ınflıatsııalyq kútýleri de ózgerip, joǵary deńgeıde qaldy»,- dedi ol. 

Onyń atap ótýinshe, syrtqy ortada álemdik azyq-túlik baǵalary óskeni baıqalady. Qazaqstannyń negizgi saýda-seriktesi – Reseıde ınflıatsııa qarqyny joǵary. Jalpy aıtqanda, álemde ınflıatsııa tómendep keledi. Oǵan ortalyq bankterdiń joǵary stavkany uzaq ýaqyt boıy ustap turýy sebep. 

«Іshki ekonomıkada proınflıatsııalyq qysym saqtalýda. Oǵan fıskaldyq yntalandyrýdyń kúsheıýinen qalyptasqan tutynýshylyq suranys, turǵyn úı kommýnaldyq qyzmeti baǵalarynyń ósýi jáne halyqtyń ınflıatsııalyq kútýlerdiń artýy áser etip otyr. Bizdiń sheshim qatań aqsha-kredıt sharttaryn ustap turý saıasatyn jalǵastyrýdy kózdeıdi. Ol baǵa ósimin baıaýlatyp, ınflıatsııa boıynsha maqsatqa qol jetkizý úshin qajet», - dedi Tımýr Súleımenov.