Ulttyq bank bazalyq mólsherleme týraly jańa sheshim qabyldady

ASTANA. KAZINFORM – Ulttyq Banktiń Aqsha-kredıt saıasaty komıteti bazalyq mólsherlemeni +/- 1 paıyzdyq tarmaq dálizimen jyldyq 16,5% deńgeıinde saqtaý týraly sheshim qabyldady.

Ulttyq bank taratqan resmı málimdemege súıensek, naýryz aıynyń qorytyndysy boıynsha jyldyq ınflıatsııa 10%-ke deıin jedeldedegen.

Jyldyq ınflıatsııanyń negizgi qozǵaýshy kúshi – qyzmet kórsetý sektory bolyp otyr. Bul retteletin tarıfterdiń birinshi toqsanda kútkennen joǵary ósýimen jáne naryqtyq qyzmetterdiń qymbattaýymen baılanysty. Azyq-túlik ınflıatsııasynyń úlesi aılyq jáne jyldyq kórsetkishterde arta túsken.

- Qazaqstan Respýblıkasy Ulttyq Bankiniń Aqsha-kredıt saıasaty komıteti bazalyq mólsherlemeni +/- 1 p.t. dálizimen jyldyq 16,5% deńgeıinde belgileý týraly sheshim qabyldady., – dep jazady Ulttyq bank málimetinde.

Sondaı-aq, álemdik azyq-túlik baǵasynyń joǵary bolýy jáne Reseıdegi eki tańbaly ınflıatsııanyń saqtalýy da bazalyq mólsherlemeni qazirgi deńgeıde qaldyrýǵa túrtki bolǵan.

- 2025 jyly qańtar-naýryzdaǵy jyldam derekterge sáıkes ekonomıka j/j 5,8% ósim kórsetti. Bul ósim kólik (21,0%), qurylys (16,9%), óńdeý ónerkásibi (8,7%), taý-ken óndirisi (6,1%) jáne saýda (6,3%) salalaryndaǵy belsendilikke baılanysty boldy.

Іshki suranysqa ınfraqurylymdyq jobalardyń iske asyrýy, tutynýshylyq kredıt berý jáne halyq tabysynyń ustamdy ósýi qoldaý qórsetedi. Degenmen, 1-toqsanda tutynýshylyq suranystyń báseńdeý belgileri baıqalýda. Bul 2024 jylǵy qazandaǵy 19,3%-ten keıin aqpanda 5,1%-ke deıin bólshek saýda aınalymynyń baıaýlaý derekterimen, sondaı-aq saýalnamalarǵa sáıkes iri satyp alýlar ındeksiniń tómendeýimen rastalady, – delingen túsindirmede.

Eske salsaq, bir aı buryn bazalyq mólsherleme 15,25% deńgeıinen 16,5%-ǵa deıin kóterilgen bolatyn.