Ulttyq bank bazalyq mólsherleme boıynsha qabyldanǵan sheshimderdi talqylaýǵa negizdelgen rezıýmeni jarııalaıdy

ASTANA. KAZINFORM – Ulttyq bank bazalyq mólsherleme boıynsha qabyldanǵan sheshimderdi talqylaýǵa negizdelgen rezıýmeni jarııalaı bastaıdy. Bul týraly Ulttyq bank tóraǵasy Tımýr Súleımenov aıtty.

- Kommýnıkatsııalyq saıasatymyzdaǵy jańa baǵyt týraly qysqasha aıtyp ótkim keledi. Aǵymdaǵy boljamdyq raýndtan bastap, álemdik tájirıbege sáıkes, Ulttyq bank bazalyq mólsherleme boıynsha qabyldanǵan sheshimderdi talqylaýǵa negizdelgen rezıýmeni jarııalaı bastaıdy, - dedi Tımýr Súleımenov.

Onyń atap ótýinshe, bul naryq qatysýshylaryna, qarjy ınstıtýttaryna jáne keń aýdıtorııaǵa Aqsha-kredıt saıasaty jónindegi komıtet músheleri qabyldaıtyn sheshimderdiń logıkasyn tereńirek túsinýge jáne protsestiń ashyqtyǵyn arttyrýǵa múmkindik beredi.

- Meniń oıymsha, bul qadam aqsha-kredıt saıasatyna jáne Ulttyq Banktiń jumysyna senimdi kúsheıtedi. Tolyǵyraq aqparatty biz dúısenbi kúni sarapshylarmen ótetin kezdesýde usynamyz.

Sondaı-aq, talqylaý nátıjeleriniń qysqasha mazmuny jarııalanǵannan keıin, qosymsha suraqtarǵa jaýap berýge daıyn bolamyz, - dedi UB tóraǵasy.

Ol bazalyq mólsherleme deńgeıin saqtaý sebebin de túsindirgen edi.