Qazaqstan ulttyq valıýta teńgeniń 30 jyldyǵyn toılaıdy
Memleket basshysy Ulttyq bank tóraǵasy Tımýr Súleımenovti qabyldady, dep habarlaıdy Kazinform Aqordaǵa silteme jasap.
Prezıdentke Ulttyq banktiń bıylǵy qańtar-qazan aılarynda júzege asyrǵan aqsha-kredıt saıasatynyń nátıjeleri jóninde esep berildi.
Memleket basshysyna Qazaqstan ekonomıkasynyń jaǵdaıy, ınflıatsııany tómendetý sharalary, sondaı-aq altyn-valıýta qorynyń, BJZQ men Ulttyq qor aktıvteriniń jaı-kúıi týraly baıandaldy.
Qasym-Jomart Toqaevqa tsıfrlyq teńgeni iske qosýǵa daıyndyq jumysynyń barysy jáne tsıfrlyq qarjylyq ınfraqurylymdy damytý jospary jaıynda málimet berildi.
Budan bólek, Tımýr Súleımenov ekonomıkany kredıtteý isin yntalandyrý úshin tıisti sharalar ázirleýge qatysty Memleket basshysynyń Qazaqstan halqyna Joldaýynda aıtylǵan tapsyrmalarynyń oryndalý barysy týraly aqparat berdi.
Sonymen qatar Ulttyq bank tóraǵasy ulttyq valıýtamyz – teńgeniń 30 jyldyǵyn atap ótýge daıyndyq jumystary jóninde aıtty.
Kezdesý sońynda Qasym-Jomart Toqaev aqsha-kredıt saıasatyn tıimdi júzege asyrýǵa baǵyttalǵan birqatar mindet júktedi.
