Ulttyq bank basshysy kóshedegi valıýta baǵamynyń kestelerin anarhonızm dep atady

ASTANA. KAZINFORM – Ulttyq bank tóraǵasy Tımýr Súleımenov kóshedegi valıýta baǵamynyń kestelerin ilýge nege tyıym salyp jatqandaryn túsindirdi.

- Jalpy mundaı sheshim bıznestiń quqyqtaryn shekteıdi degen kózqarastar orynsyz dep oılaımyn. Óıtkeni bárimiz tsıfrlyq dáýirde ómir súrip jatyrmyz. Qoldaǵy uıaly telefonnyń kómegimen qazir, tipti japonnyń ıeni qansha turatynyn, dırham qanshadan satylyp jatqanyn qas qaǵymda kórýge bolady. Baǵamdy kórsetip turatyn belgiler – toqsanynshy jyldardan qalǵan anarhonızm, - dedi ol.

Ulttyq bank damyǵan elderdiń iri qalalarynda valıýta baǵamyn kóshedegi tabloǵa ilip qoıý dástúri qazir joq ekenin aıtady. Mundaı tásil týrızmi damyǵan qalalarda ǵana saqtalyp otyrǵan kórinedi.

- Bizde qandaı sebepterge baılanysty ekenin bilmeımin, baǵa tablolary qalyp qoıǵan. Vetnamda, Taılandta baı demalýshylar kelgen kezde qolma-qol aqshany jergilikti valıýtaǵa aıyrbastaıdy. Bizdiń ekonomıkanyń tiregi, kepili – týrızm emes. Bizdiń ekonomıka qolma-qol aqshamen keletin týrısterdi qajet etedi dep oılamaımyn. Sondyqtan, osyndaı tetikterdi ózgertýimiz kerek boldy, – dedi Tımýr Súleımenov.

Aıta keteıik, búgin Ulttyq bank bazalyq mólsherleme týraly jańa sheshim qabyldady.