Ulttyq bank basshysy qazaqstandyqtardy krıptovalıýtaǵa ınvestıtsııa salýǵa shaqyrdy

ALMATY. KAZINFORM – QR Ulttyq bank tóraǵasy Tımýr Súleımenov elimizde krıptovalıýtany qaı jaǵynan damytýǵa bolatynyn aıtty.

Tımýr Súleımenov qarjygerlerdiń XII kongresi barysynda «Astana» halyqaralyq qarjy ortalyǵynyń ınfraqurylymy aıasynda krıptobırjalardyń jekelegen túrlerin zańdastyrý máselesi sonaý 2022 jyly talqylanǵanyn atap ótti.

Osyǵan qaramastan, Qazaqstanda krıptovalıýta naryǵynyń damýy áli de shekteýli bolyp otyr.

Sonymen birge ol Qyrǵyzstan men Ózbekstan sııaqty elderdiń krıptovalıýtalardy retteýde aıtarlyqtaı jetistikterge jetkenin jáne saýda kólemi boıynsha qazirdiń ózinde Qazaqstannan alda ekenin tilge tıek etti.

«Meniń oıymsha, biz ıýrısdıktsııa sheńberinde qorǵalǵan tsıfrlyq aktıvterdi baqylanatyn túrde shyǵarýǵa jáne aınalymyna múmkindik berýimiz kerek. Osyǵan jettik dep oılaımyn», - dedi Tımýr Súleımenov.

Ulttyq bank basshysy qazaqstandyqtardyń krıptovalıýtaǵa belsendi túrde ınvestıtsııa salyp jatqanyn erekshe atap ótti

«Olardyń bar ekendigi shyndyq. Biz retteýshi retinde olardy moıyndaǵymyz kelmeı, esigimizdi jaýyp otyra berýimiz olardyń joǵalyp ketýin bildirmeıdi. Bul qazaqstandyqtardyń jáne naqty adamdardyń aktıvteri ol jerge salynbaıdy degen sóz emes. Men munda úlken kólemdegi aktıvterdiń ınvestıtsııalanyp jatqanyna senimdimin. Onyń ústine aktıvter dollar túrinde. Olar ınvestıtsııa salady. Biz muny kórmeımiz. Tyıym salýǵa bolmaıdy, kerisinshe, bar bolsa, ruqsat eteıik. Sonyń ishinde krıpto almastyrǵyshtar sııaqty dúnıe bar. Bul retteletin saladan múldem tys emes, belgili bir retteý jáne esep berý arqyly bizdiń quqyqtyq júıemizdiń aıasynda zańdy túrde sheshilse, jaqsy bolar edi», - dep atap kórsetti Tımýr Súleımenov.

Osy másele boıynsha Ulttyq banktiń ustanymy lıberaldy.

«Sondyqtan aldaǵy ýaqytta krıptovalıýta aktıvterin jáne aıyrbastaý operatsııalaryn zańdastyrý máselesi tek dástúrli qarjy qurylymdarymen ǵana emes, sonymen qatar fınteh jáne krıptoındýstrııa salasyndaǵy jańa oıynshylarmen de talqylanatyn bolady»,- dedi ol.

Buǵan deıin habarlanǵandaı, qarjy uıymdarynyń aktıvteri 65 trln teńgege ulǵaıdy.