Ulttyq bank basshysy qarjy júıesin ózgertetin basty faktorlardy atady
ASTANA. KAZINFORM – Qazirgi qarjy júıesine geosaıası ahýal men tehnologııanyń qarqyndy damýy kóp yqpal etip otyr. Bul týraly Ulttyq bank tóraǵasy Tımýr Súleımenov Astana Finance Days 2026 aıasynda aıtty.
Onyń sózinshe, álemdegi geosaıası shıelenis pen elder arasyndaǵy qaıshylyqtar saýdaǵa ǵana emes, qarjy júıesine de tikeleı áser etip otyr.
– Birinshi faktor – geosaıası shıelenis pen álemdegi bóliný protsesi. Muny elemeý múmkin emes. Biz Atlantıkanyń eki jaǵyndaǵy, Soltústik Amerıkadaǵy qaıshylyqtardy, álemniń ár bóligindegi saýda soǵystaryn kórip otyrmyz. Al qarjy árdaıym saýda jáne ınvestıtsııamen qatar júredi. Sondyqtan bul protsester qarjy salasyna da tikeleı áser etedi, – dedi Tımýr Súleımenov.
Ulttyq bank tóraǵasy ekinshi negizgi faktor retinde jańa tehnologııalardy atady. Onyń aıtýynsha, blokcheın, tsıfrlyq valıýtalar jáne basqa da jańa qarjy quraldary dástúrli qarjy júıesin túbegeıli ózgertip jatyr.
– Qazir biz qarjy salasynyń jańa erejeleri qalyptasyp jatqan kezeńdemiz. Tsıfrlyq jáne krıptoqarjyǵa qatysty álemge ortaq biryńǵaı talaptar áli joq. Sondyqtan kóptegen el dástúrli qarjy ınstıtýttary men naryqqa enip jatqan jańa qarjy quraldarynyń arasynda durys tepe-teńdik tabýǵa tyrysyp jatyr, – dedi ol.
Tımýr Súleımenov bul ózgerister Qazaqstan úshin jańa múmkindik ekenin atap ótti. Onyń aıtýynsha, elimizdiń qarjy júıesi óńirdegi eń damyǵan ári tsıfrlandyrý deńgeıi joǵary júıelerdiń biri.
Sondaı-aq Qazaqstan jańa qarjy quraldaryn retteý baǵytynda naqty qadamdar jasap jatqanyn aıtty.
– Biz bul ózgeristerdi syrttaı baqylap otyrǵan joqpyz. Qazirdiń ózinde naqty erejeler qabyldandy. Onyń ishinde krıptovalıýtany saýdalaý, steıblkoındardy paıdalaný jáne naqty aktıvterdi tokendeý tártibi bar, – dedi Ulttyq bank tóraǵasy.
Aıta keteıik, búgin elordada Astana Finance Days forýmy ótip jatyr. Bıylǵy is-sharaǵa álemniń 90 elinen 8 myńǵa jýyq qatysýshy tirkelgen. Forým aıasynda Qazaqstannyń taý-ken jáne kreatıvti ındýstrııa salasyndaǵy jobalary sheteldik ınvestorlarǵa tanystyrylyp jatyr.
