Ulttyq bank basshysy eń tómengi aılyq týraly: 85 myń teńge kúnkóriske jetpeıdi

ASTANA. KAZINFORM — Ulttyq bank tóraǵasy Tımýr Súleımenov bazalyq mólsherlemeni belgileýge arnalǵan brıfıngide eldegi eń tómengi aılyq kúnkóriske jetpeıtinin aıtty.

«Eńbek jáne halyqty áleýmettik qorǵaý mınıstri Svetlana Jaqypova BAQ ókilderiniń suraǵyn jaýap bere otyryp, eń tómengi aılyq kólemi 85 myń teńge bolý kerek dedi. Siz osyndaı ustanymmen kelisesiz be? Mundaı mólsher eńbektiń ádiletti ótemi dep esepteısiz be?» dep surady jýrnalıst spıkerden. 

Ulttyq bank tóraǵasy eldegi eń tómengi aılyqtyń mólsherin birtindep kóterý kerek dep sanaıtynyn jetkizdi.

«Eń tómengi eńbekaqy degen is júzinde tólenetin aılyq emes dep esepteımin. Bul — kóbine ózge esepteý júrgizýge qoldanylatyn ekonomıkalyq kórsetkish. ıAǵnı, zań boıynsha ıntellektýaldy eńbekke de, qara jumysqa da, fızıkalyq eńbekke de 85 myń teńgeden az tóleýge bolmaıdy. Zań boıynsha osylaı. Al ádildik áńgimesine kelsek, 85 myń teńge jete me, jetpeı me degen suraq týyndaıdy. Árıne, 85 myń teńge (kún kórýge — red.) jetpeıdi. Qazaqstanda eń tómengi eńbekaqy kóterilip keledi. 6 jyl buryn tipti 28 500 teńge bolǵan. Sodan beri 42 500-ge, 60 myńǵa, endi 85 myńǵa degen sııaqty birtindep kóterilip otyrdy. Bul ınflıatsııa qarqynynan aıtarlyqtaı jyldam deýge bolady. Biz sanaly túrde ınflıatsııadan alǵa júrip otyrdyq. Biz eń tómengi eńbekaqy deńgeıin is júzindegi aılyqtardyń deńgeıine deıin kóterýimiz kerek. Sonda eń tómengi aılyq búkil kórsetkishterdi tómennen bastap kóterer edi. Sondyqtan eń tómengi aılyq ósip keledi», — dedi ol.

Ulttyq bank basshysy eń tómengi aılyq mólsheri ári qaraı da ósý kerek dep esepteıdi.

«Biraq bul jerde eńbektiń aqysymen birge ónimdiliginiń de óskenin qarastyrýymyz kerek. Eńbek ónimdiligi artpasa, básekege qabilet joǵalady. Bul bizdiń naryqty, taýarlardy básekege qabiletsiz etedi. Men qyzmetkerlerime joǵary aılyq tóleýim múmkin. Onyń esebinen taýardy nemese qyzmettiń ózindik quny ósedi. Osylaısha naryqta básekege qabilet azaıady. Sondyqtan bul — makroekonomıkalyq turǵydan da, mıkroekonomıkalyq turǵydan da zerdeleıtin názik másele. Eger menen ekonomıst retinde surasańyz, jalpy eń tómengi aılyqty kezeń-kezeńimen ósirýdi qoldaımyn» — dedi Tımýr Súleımenov. 

Eske salsaq, qazaqstandyqtar laıyqty ómir súrý úshin qansha tabys tabýy kerek dep esepteıtinin aıtqan edi.