Ulttyq bank basshysy «bólip tóleý» quralynyń nesıe paıyzy qalaı jasyratynyn aıtty

ASTANA. KAZINFORM — Ulttyq bank tóraǵasy Tımýr Súleımenov bankterdiń «bólip tóleý» quraly qaryz paıyzyn qalaı jasyratynyn óz basynan ótken jaǵdaıdyń mysalymen túsindirdi.

— Bizdegi tutyný nesıesiniń naryǵynda bólip tóleý quralynyń deńgeıi joǵary. Bul jerde nesıeniń baǵasy taýardyń baǵasyna jasyrylǵan. Ol mólsherlemeni bylaısha kórmeısiń. Mólsherleme «0» dep kórsetilgenimen, shyn máninde nesıeniń quny taýar baǵasynda jasyrynyp jatady. Jýyqta biz teledıdar satyp aldyq. Dúkenge bardyq ta, Sulpak-tyń nesıe rásimdeıtin terezesine jaqyndadyq. Nesıe kelisimshartyna qol qoıdyq. Men ol jerde tipti nesıeniń paıyzdyq mólsherlemesi qandaı ekenine qaraǵan da joqpyn. Teledıdardyń baǵasy men aı saıyn qansha tóleıtinime ǵana qaradym. ıAǵnı, halyqqa 24 aıǵa bólgende aı saıyn qanshadan keletinin áldeqaıda mańyzdy. Shartty túrde 500 myń teńge turady dep eseptesek, aı saıynǵy tólem 50 myń teńge bolady. «Tóleı alamyn» dep oıladym. Al astarynda qandaı mólsherleme jatqanyna, 20, 21 nemese 22% bola ma, ol jaǵyna qaraǵan joqpyn. Óıtkeni, aı saıyn qansha tóleıtinime mán berdim, — deıdi ol.

Ulttyq bank basshysy halyqtyń kóbi osyndaı sheshim qabyldaýǵa beıim turatynyn aıtady.

— Ókinishke qaraı, halyqtyń kóbi osyndaı faktorlarǵa súıenip sheshim qabyldaıdy. Baǵasy men aılyq tólemine qaraıdy. Sondyqtan bazalyq mólsherleme men tutyný nesıesiniń mólsherlemesiniń arasyndaǵy qubylý sonshalyq aıqyn emes. Biraq sonyń ózi Ulttyq bank pen Qarjy naryǵyn retteý jáne damytý agenttigin tutyný nesıesine paıyzdyq mólsherleme arqyly emes, makropaıyzdyq sharalar arqyly áser etýge májbúrleıdi, — dedi ol.

Búgin ulttyq bank bazalyq mólsherlemeni kótergen bolatyn.