Ulttyq Bank Basqarmasy valıýtalyq retteý máselelerine qatysty ózgeristerdi bekitti
ASTANA. KAZINFORM – Qazaqstan Ulttyq Banki QUB Basqarmasynyń kezekti otyrysynda aqsha jáne valıýta naryǵyndaǵy jaǵdaı týraly baıandama qabyldandy. Bul týraly Ulttyq banktiń baspasóz qyzmeti málim etti.
2024 jyldyń tórtinshi toqsanynda Ulttyq qordy senimgerlik basqarý nátıjeleri týraly esep bekitildi.
2024 jyldyń qorytyndysy boıynsha Ulttyq qordyń valıýtalyq aktıvteri 58,8 mlrd AQSh dollaryn qurady. Jyldyq ınvestıtsııalyq tabys 4,6 mlrd AQSh dollary nemese 7,6% boldy. Qor qurylǵaly jınaqtalǵan kiristilik — 128% nemese jyldyq mánde 3,55%.
— Ulttyq Bank Basqarmasy valıýtalyq retteý máseleleri boıynsha birqatar normatıvtik quqyqtyq aktige ózgerister men tolyqtyrýlar da engizdi. Bankterdiń valıýtalyq operatsııalar boıynsha esep berý merzimi qysqartylyp, valıýtalyq zańnama talaptarynan jaltarý úshin jasalýy múmkin jáne qarjy monıtorıngine jatatyn operatsııalar tizimi keńeıtildi, — delingen Ulttyq bank habarlamasynda.
Sonymen qatar, Basqarma sheshimimen aqsha aıyrbastaý pýnkteri arqyly júrgiziletin operatsııalar úshin qolma-qol shetel valıýtasyn satyp alý jáne satý baǵamdarynyń aıyrmashylyǵy shekteldi: AQSh dollaryna — 7 teńge, eýroǵa — 10 teńge.
Buǵan qosa, jıynda tólem júıeleri jáne Ulttyq Banktiń ózge de qyzmetine qatysty máseleler boıynsha Qazaqstan Respýblıkasy Ulttyq Banki Basqarmasynyń keıbir qaýlylaryna ózgerister men tolyqtyrýlar engizý týraly sheshim qabyldandy.
Eske sala keteıik, buǵan deıin Ulttyq bank tóraǵasynyń birinshi orynbasary aýysqanyn jazǵan bolatynbyz.