Ulttyq bank bankter úshin eń tómengi rezervtik talaptardy arttyrady

ASTANA. KAZINFORM – Ulttyq bank basqarmasy 2025 jylǵy 25 shildede «Qazaqstan Respýblıkasy Ulttyq banki basqarmasynyń keıbir qaýlylaryna eń tómen rezervtik talaptar máselesi boıynsha ózgertýler men tolyqtyrýlar engizý týraly» qaýlyny bekitti. 

Ózgertýler ETRT quralyn Ulttyq banktiń QRUB aqsha-kredıt saıasaty quraldaryn jetildirý jáne antıınflıatsııalyq baǵytty kúsheıtý aıasynda engiziledi.

— Usynylyp otyrǵan túzetýler EAEO, Ortalyq Azııa jáne Kavkaz elderi ortalyq bankteriniń halyqaralyq ETRT qoldaný tájirıbesin zerdelep, taldaý negizinde ázirlendi. Osy elderde (Qazaqstandy esepke almaǵanda) ulttyq valıýtadaǵy mindettemeler boıynsha ETRT normatıvteriniń ortasha deńgeıi 4–4,5%-dy, al shetel valıýtasyndaǵy mindettemeler boıynsha shamamen 15%. Qazaqstanda ETRT normatıvteriniń deńgeıi aımaqta eń tómeni bolyp keldi — teńgedegi mindettemeler boıynsha tıimdi mólsherleme — 1,3%, al shetel valıýtasyndaǵy mindettemeler boıynsha — 2,5%.

Qujatta mynadaı normatıvter belgilenedi: teńgedegi mindettemeler boıynsha — 3,5% jáne 5%, valıýtalyq mindettemeler boıynsha — 10% jáne 15%. Bul rette bank sektoryn engiziletin ózgeristerge beıimdeý maqsatynda MRT normatıvteri maqsatty deńgeıge kezeń-kezeńimen bir jyl ishinde kóteriledi, — delingen habarlamada.

Jumys barysynda QRUB tarapynan naryq ókilderimen birqatar kezdesý ótkizildi, onda halyqaralyq tájirıbe men ETRT mehanızmine josparlanyp otyrǵan ózgerister tanystyryldy. QRUB saraptamalyq-taldamalyq pikir almasý klýby aıasynda qarjy naryǵy men akademııalyq qaýymdastyq ókilderiniń jáne sarapshylardyń qatysýymen, sonymen qatar, bankterdiń birinshi basshylarymen, ókilderimen jáne Qazaqstan qarjygerler qaýymdastyǵynyń ókilderimen birneshe kezdesý ótti.

— Qabyldanǵan sharalar aqsha agregattarynyń shamadan tys ósýin tómendetýge, aqsha-kredıt saıasatynyń transmıssııasyn jaqsartýǵa múmkindik beredi, bul ınflıatsııaǵa qarsy kúrestiń tıimdiligin arttyrady.

Ulttyq Banktiń basty maqsaty — ınflıatsııany 5%-ǵa deıin tómendetý. Osy maqsatqa qol jetkizý úshin qolda bar barlyq qural paıdalanylady. Tómen jáne turaqty ınflıatsııa — bul teńgeniń satyp alý qabiletin, azamattardyń eńbek tabysyn saqtaý, sondaı-aq teńgerimdi ári ornyqty ekonomıkalyq ósim úshin qolaıly ortany qamtamasyz etýdiń negizi sanalady, — delingen Ulttyq bank habarlamasynda. 

Aıta ketelik Ulttyq bank valıýtalyq ınterventsııaǵa qatysty málimdeme jasaǵan edi.