Ulttyq bank bankaralyq mobıldi tólemder júıesiniń qaǵıdalaryn bekitpek

ASTANA. KAZINFORM — Osy júıeniń kómegimen klıentter alýshynyń telefon nómirin ǵana bile otyryp, aqshany basqa bankterge aýdara alady. 

Ulttyq bank «Bankaralyq mobıldi tólemder júıesiniń jumys isteý qaǵıdalaryn bekitý týraly» qaýly jobasyn ázirledi.

Joba «Qazaqstan Respýblıkasynyń keıbir zańnamalyq aktilerine qarjy naryǵyn retteý men damytý, baılanys jáne bankrottyq máseleleri boıynsha ózgerister men tolyqtyrýlar engizý týraly» zańdy iske asyrý úshin ázirlendi.

— Bankaralyq mobıldi tólemder júıesi — bul ońaılatylǵan derektemeler (telefon nómiri jáne QR) boıynsha naqty ýaqyt rejıminde bankaralyq klıenttik aýdarymdar men tólemderdi júrgizýge múmkindik beretin Ulttyq banktiń tólem júıesi. Klıentterge júıedegi qyzmetterdi ekinshi deńgeıli bankter kórsetedi.

Qaýly jobasy júıeniń jumys isteý tártibin aıqyndaıdy, qatysýshy bankterge aqparat almasý, ońaılatylǵan ıdentıfıkator boıynsha bankaralyq aqsha aýdarymdary men QR-kodty paıdalana otyryp tólem boıynsha qyzmet kórsetý kezinde ózara is-qımyl jasaý talaptaryn belgileıdi, — delingen bank habarlamasynda.

Osy júıeniń kómegimen klıentter alýshynyń telefon nómirin ǵana bile otyryp, aqshany basqa bankterge aýdara alady. Kásipkerler úshin bankaralyq QR-kodty paıdalana otyryp tólemderdi qabyldaý kezinde ártúrli bankterdiń birneshe POS-termınalyn ornatý qajettiligi joıyldy. Servıs satyp alýshylarǵa basqa bankterdiń paıdasyna bankaralyq QR-tólemderdi júzege asyrýǵa múmkindik beredi (óz bankiniń mobıldi qosymshasy arqyly).

Osylaısha júıeni engizý klıent múddesi úshin bankter arasynda ózara is-qımyl tıimdiligin arttyrady jáne qolma-qol aqshasyz tólemderdiń qoljetimdiligin odan ári keńeıtýdi ári arttyrýdy qamtamasyz etedi. 

Aıta ketelik Ulttyq bank alaıaqtyqty erte anyqtaý úshin jasandy ıntellektini engizip jatyr.