Ulttyq bank alaıaqtyqtyń jańa túri paıda bolǵanyn eskertedi

ASTANA. KAZINFORM – Ulttyq bank qundy zattardy ınkassatsııalaý qyzmetin usynatyn kompanııalardyń túrli ınternet-resýrstarda jarııalanatyn habarlamalaryna saq bolý kerek ekenin eskertedi. Sebebi olardyń arasynda tıisti QUB lıtsenzııasy joq kompanııalar da kezigip jatady.

- Ózge uıymǵa berilgen QUB lıtsenzııasynyń rekvızıtterin zańsyz paıdalanyp júrgender bar. Sondaı derektiń biri ózin «Brinks» Inkassatsııa qyzmeti» JShS dep ataıtyn uıym saıtynda (ony sheteldik The Brink's Company ınkassatorlyq kompanııasymen shatastyrýǵa bolmaıdy) ornalastyrylǵan. Sol arqyly bul kompanııa óz qyzmetiniń zańdy ekenin kórsetýge tyrysqan. Osyndaı uıymdarmen shart jasasyp, olarǵa qundy zattardy ınkassatsııaǵa berý – táýekeli joǵary is, - delingen Ulttyq bank taratqan habarlamada.

Ulttyq bank azamattar men zańdy tulǵalardy saq bolýǵa jáne ınkassatsııa boıynsha qyzmetterdi júzege asyrýǵa lıtsenzııasy bar uıymdardyń qyzmetin paıdalanýǵa shaqyrady.

- Belgili bir uıymda lıtsenzııanyń bar-joǵyn tekserý úshin QUB saıtynda ornalastyrylǵan tıisti lıtsenzııasy bar uıymdardyń resmı tizilimimen tanysý qajet. Qandaı da bir alaıaqtyq áreketke tap bolǵan jaǵdaıda Qazaqstan Respýblıkasynyń quqyq qorǵaý organdaryna aryzben júginýge keńes beremiz. Keńes alý úshin 1477 nómiri arqyly Ulttyq banktiń Baılanys ortalyǵyna habarlasýǵa bolady, - delingen habarlamada.