Ulttyq bank alaıaqtyqty erte anyqtaý úshin jasandy ıntellektini engizip jatyr

ASTANA. KAZINFORM — 1 qańtardaǵy jaǵdaı boıynsha Antıfrod-ortalyq alaıaqtyq belgisi bar 80 871 tranzaktsııany, sondaı-aq esirtki saýdasy men zańsyz oıyn bıznesine jáne qarjy pıramıdasyna qatysty 19 810-ǵa jýyq oqıǵany tirkedi. 

 Antıfrod-ortalyqtyń jumysy arqasynda 2,8 mlrd teńge der kezinde buǵattaldy, alaıaqtardyń áreketinen zardap shekken azamattarǵa jarty mıllıardtan astam teńge qaıtaryldy.

Antıfrod-ortalyqtyń biryńǵaı kontýry aıasynda alaıaqtyq operatsııalarǵa qarsy is-qımyl protsesiniń negizgi qatysýshylary, onyń ishinde qarjy naryǵynyń, Bas prokýratýra, Іshki ister mınıstrligi men uıaly baılanys operatorlarynyń ózara is-qımyly jolǵa qoıylǵan.

2025 jyly Ulttyq bank Antıfrod-ortalyqtyń fýnktsıonalyn keńeıtý jáne jumys tıimdiligin arttyrý boıynsha aýqymdy jumys júrgizdi. Zańnamalyq túzetýler paketi qabyldandy. Ol:

• zardap shekkenderge buǵattalǵan aqshany qaıtarý protsedýrasyn jeńildetýdi;
• alaıaqtyqqa qatysy bar nómirlerdi anyqtaý úshin Antıfrod-ortalyqty uıaly baılanystyń abonent qurylǵylarynyń sáıkestendirý kody derekqorymen (IMEI-kodtar) jáne baılanys operatorlarynyń bazalarymen ıntegratsııalaýdy, sondaı-aq olardy buǵattaý talaptaryn;
• basqa zańsyz operatsııalarǵa qarsy is-qımyl jasaý úshin qosymsha málimetter bazasyn qosý arqyly Antıfrod-ortalyqtyń fýnktsıonaldyǵyn keńeıtýdi (esirtki saýdasy, zańsyz oıyn bıznesi jáne basqalar salasynda);

Antıfrod-ortalyqtyń derekqoryna engizilgen tulǵalardyń qarjylyq qyzmetiniń shekteýli tizbesin alý múmkindigin (zeınetaqy, shákirtaqy, járdemaqy jáne jalaqy tóleý aıasynda áleýmettik tólemder men ózge de aqsha aýdarymdaryna qol jetkizýdi) qamtıdy.

Sonymen qatar, Antıfrod-ortalyq platformasynyń ózara ıntegratsııalyq is-qımyly edáýir keńeıtildi.

— 2025 jylǵy tamyzda Ulttyq bank pen Bas prokýratýra Antıfrod-ortalyqty «Sotqa deıingi tergep-tekserýdiń biryńǵaı tizilimi» (Biryńǵaı tizilim) aqparattyq júıesimen ıntegratsııalaýdyń birinshi kezeńin aıaqtady. Bul quqyq buzýshylyqtardy tirkeý jáne qujattaý rásimin jeńildetti, Bas prokýratýranyń zańsyz operatsııalardy qadaǵalaýyn kúsheıtti, sondaı-aq oqıǵalarǵa jaýap berýdi jedeldetti. Jasandy ıntellekt jáne tsıfrlyq damý mınıstrliginiń uıaly baılanystyń abonenttik qurylǵylarynyń sáıkestendirý kody (IMEI-kodtar) derekqorymen ıntegratsııalaý jumystary da júrgizilip jatyr, — delingen habarlamada.

Bankter týraly jańa zań men ilespe zań aıasynda qarjy naryǵyndaǵy alaıaqtyqqa qarsy kúresti kúsheıtýge jáne qarjylyq qyzmetterdi tutynýshylardyń quqyǵyn qorǵaýǵa baǵyttalǵan túzetýler qabyldandy.

Atap aıtqanda, Antıfrod-ortalyqqa qatysýshylar aıasy keńeıtildi — kredıttik bıýrolar engizildi. Olar úshin jeke tulǵa bir saǵat ishinde eki nemese odan da kóp qarjy uıymyna tutynýshylyq banktik qaryz nemese mıkrokredıt alýǵa ótinish bergen jaǵdaılar týraly aqparatty Antıfrod-ortalyqqa jedel berý mindeti belgilengen.

Budan basqa, eger jábirlenýshige tólem nemese aýdarym jasalǵan jaǵdaıda aqshany óteý mindetimen qarjy jáne tólem uıymdarynyń kelesideı jaýapkershiligi engizildi:

• benefıtsıar Antıfrod-ortalyqtyń derekqorynda bolǵan kezde oǵan tólem nemese aqsha aýdarý;
• alaıaqtyq faktisi boıynsha zańdy kúshine engen sot aktisi bolǵan kezde aqsha jóneltýshini sáıkestendirý talaptaryn buzǵanda.

Ulttyq bank Antıfrod-ortalyqty odan ári damytý aıasynda klıenttiń kúdikti operatsııalaryn erte anyqtaý úshin platformanyń analıtıkalyq áleýetin damytý baǵytynda jumys júrip jatyr. Pılottyq joba aıasynda minez-qulyqty taldaý jáne alaıaqtyq qaýipti boljaý úshin jasandy ıntellekt quraldary paıdalanylady. 

Aıta ketelik antıfrod júıeleri arqyly 77 mıllıonnan astam alaıaqtyq qońyraý buǵattaldy.