Ulttyq bank alaıaqtyqqa tán tranzaktsııalar týraly derek almasatyn Antıfrod-ortalyqty iske qosty
ASTANA. KAZINFORM – Ulttyq Bank Alaıaqtyqqa tán tranzaktsııalar boıynsha derek almasý ortalyǵynyń (budan ári – Antıfrod-ortalyq) óndiristik paıdalanýǵa berilgenin habarlaıdy. Joba quqyq qorǵaý organdarymen jáne qarjy naryǵyna qatysýshylarmen birlesip iske asyryldy. Bul týraly banktiń baspasóz qyzmeti málim etti.
«Antıfrod-ortalyǵy alaıaqtyq belgisi bar operatsııalarǵa qarsy áreket etý úshin qurylǵan. Qarjy uıymdaryna alaıaqtyqqa tán operatsııalardy anyqtaýǵa jáne buǵattaýǵa, alaıaqtyq belgisi bar operatsııalarǵa jedel áreket etýge, onyń qatysýshylary arasynda naqty ýaqyt rejıminde aqparat almasýǵa da múmkindik beredi. Antıfrod-ortalyqtyń jumysy alaıaqtyq operatsııalar boıynsha biryńǵaı derekter bazasyn júrgizýdi de kózdeıdi», — delingen habarlamada.
Platforma iske qosylǵan sátten bastap qarjy uıymdary men quqyq qorǵaý organdary alaıaqtyq operatsııalar boıynsha 400-ge jýyq faktini anyqtady jáne alaıaqtyq árekettermen baılanysty 30 mıllıon teńgege jýyq qarajatty buǵattady.
«Antıfrod-ortalyǵy ashyq baǵdarlamalyq ınterfeıster (API) men bıznes-protsesterdi avtomattandyrý arqyly odan ári damyp, tehnologııalyq fýnktsıonaldylyqty keńeıte túsedi. Kúdikti tranzaktsııalardy anyqtaý tıimdiligin arttyrý úshin jasandy ıntellekt tehnologııalaryn qoldaný da josparda bar», — dep habarlady Ulttyq banktiń baspasóz qyzmeti.
Ulttyq Bank, sondaı-aq, yqtımal alaıaqtyq áreketterdiń aldyn alý úshin Antıfrod-ortalyqtyń qyzmetkerleri men ókilderi aqparat jınaý nemese qandaı da bir operatsııa júrgizý maqsatynda eshýaqytta jeke tulǵaǵa qońyraý shalmaıtynyn habarlaıdy.
Antıfrod-ortalyq óz qyzmeti aıasynda jeke tulǵalarmen ózara baılanys ornatpaıdy, tek qarjy, tólem uıymdarymen, quqyq qorǵaý organdarymen jáne uıaly baılanys operatorlarymen jumys isteıdi.
Osyǵan baılanysty azamattardy qyraǵy bolýǵa jáne Antıfrod-ortalyǵy atynan dep qońyraý shalýy múmkin alaıaqtardyń áreketin elemeýge shaqyrady.
