Ulttyq bank alaıaqtar paıdalanatyn qosymshalardy atady

ASTANA. KAZINFORM — Ulttyq bank qazaqstandyqtardy Ulttyq banktiń atyn jamylyp qońyraý shalatyn alaıaqtardan saq bolýǵa shaqyrdy. 

— Ulttyq bank azamattardy abaı bolýǵa jáne qońyraýlardyń, suratýlardyń, hattar men habarlamalardyń dáıektiligin mindetti túrde tekserýge, sondaı-aq kúmándi siltemelerge ótpeýge, belgisiz adamdardyń shotyna aqsha aýdarmaýǵa, HopToDesk, RustDesk, RUDesktop, AnyDesk, TeamViewer jáne basqa da qashyqtan basqarylatyn qosymshalardy ornatpaýǵa shaqyrady.

Ulttyq bank qyzmetkerleri aýdıo jáne vıdeoqońyraý shalmaıtynyn, jeke tulǵalardyń shotyna qyzmet kórsetpeıtinin, túrli ınvestıtsııalyq paı qorlary men qarjy ónimderine qarjylyq salym salýdy usynbaıtynyn, aqsha quraldaryn saqtandyrýmen aınalyspaıtynyn, sondaı-aq halyqpen aqshalaı esep aıyrysý júrgizbeıtinin eske salamyz, — dep jazady retteýshi organnyń resmı saıty.

Ulttyq banktiń dereginshe, memlekettik organdar, ekinshi deńgeıli bankter, kommýnaldyq, medıtsınalyq mekemeler men poshta qyzmetteriniń atynan siltemege ótýdi suraıtyn jasyryn elektrondyq hattar men jalǵan SMS-habarlar qosymsha qaýip týdyryp otyr.

— Ondaı siltemege ótse nemese qosymshany júktese, qaskóıler mobıldi qurylǵyǵa, parolderge, bank kartasynyń derekterine jáne basqa da jeke aqparattarǵa qol jetkizedi, — delingen resmı málimette.

Alaıaqtardan qorǵaný úshin Ulttyq banktiń Baılanys ortalyǵyna nemese 1477 qysqa nómirine habarlasýǵa bolady.

Buǵan deıin AITU PASS arqyly jasalǵan alaıaqtyqqa baılanysty BTS kompanııasy pikir bildirgen bolatyn.