Ulttyq bank aqsha-kredıt sharttaryn ustamdy qatań dep baǵalaıdy
ASTANA. KAZINFORM – Ulttyq bank ınflıatsııanyń 5 paıyzdyq ortamerzimdi maqsatyna tezirek qol jetkizý úshin aqsha-kredıt sharttaryn osy deńgeıdi saqtap qalýǵa tyrysady. Bul týraly Ulttyq bank tóraǵasy Tımýr Súleımenov aıtty.
«Inflıatsııanyń qaıta tómendeı bastaýyna qaramastan, syrtqy sektorda jáne ekonomıkanyń ishki kontýrynda táýekel faktorlaryna baılanysty baǵalarǵa belgili bir qysym artqanyn aıtqym keledi. Erekshe atap ótkim keletin faktor – ósip jatqan fıskaldyq alshaqtyqty jabý quraldaryna jáne ony Ulttyq qordyń qarajaty esebinen qarjylandyrýdy jalǵastyrýǵa qatysty belgisizdik», - dedi UB tóraǵasy.
Onyń atap ótýinshe, aıyrbastaý baǵamynyń álsireýinen jáne aqsha naryǵyndaǵy mólsherleme dınamıkasynan týyndaǵan, birshama jeńildetilgen aqsha-kredıt sharttaryn eskersek, munyń bári bazalyq mólsherlemeni tómendetýge aıtarlyqtaı shekteý qoıady.
«Sol sebepti, ınflıatsııa jáne onyń ornyqty bóligi turaqty túrde tómendese jáne fıskaldyq alshaqtyq máselesi tıimdi ári júıeli sheshimin tapsa, aldaǵy sheshimderdi qabyldaý kezinde mólsherlemeni baıypty jáne teńgerimdi negizde tómendetý múmkindigi qarastyrylady. Osy oraıda biz aldynda jarııalaǵan baǵytta áreket ete beremiz. Boljamdy kezeńde kútiletin ekonomıkanyń ósýin eskersek, biz qazirgi aqsha-kredıt sharttaryn ustamdy qatań dep baǵalaımyz. Ulttyq bank ınflıatsııanyń 5 paıyzdyq ortamerzimdi maqsatyna tezirek qol jetkizý úshin aqsha-kredıt sharttaryn osy deńgeıdi saqtap qalýǵa tyrysady. Biz makroekonomıkalyq salalyq derekterdi baqylaımyz. Qarashada bolatyn boljamdy raýnd barysynda qalyptasyp jatqan faktorlar men táýekelderdiń kútiletin ınflıatsııa dınamıkasyna áserin, sonymen birge jalpy jáne bazalyq ınflıatsııanyń targetke jaqyndaý traektorııasy baǵalanady», - dedi Tımýr Súleımenov.
Eske sala keteıik, buǵan deıin Ulttyq bank tóraǵasy Tımýr Súleımenov 9 aıdaǵy qysqamerzimdi ekonomıkalyq ındıkator 4,4 paıyz deńgeıinde baǵalanatynyn aıtqan bolatyn.
