Ulttyq bank 2027 jyly eldegi ınflıatsııa qandaı deńgeıde bolatynyn boljady
ASTANA. KAZINFORM — Ulttyq bank tóraǵasy Tımýr Súleımenov aldaǵy úsh jylǵa arnalǵan ınflıatsııa boljamyn jarııalap, onyń ne sebepti qaıta qaralǵanyn túsindirdi.
2026 jylǵa arnalǵan ınflıatsııa boljamy burynǵydaı 9-11% deńgeıinde qaldy. Al Ulttyq bank 2027 jylǵy ınflıatsııa 6,5-8,5% aralyǵynda bolady dep boljap otyr.
— Buǵan syrtqy ınflıatsııanyń ósýi, retteletin baǵalarǵa qatysty boljamdardyń qaıta qaralýy, sondaı-aq Úkimettiń buǵan deıingi áleýmettik-ekonomıkalyq damý boljamdarymen salystyrǵanda bıýdjet shyǵystarynyń ekonomıkaǵa yqpaly kúsheıýi sebep bolyp otyr. Sonymen qatar negizgi saýda seriktesimiz — Reseıde ınflıatsııanyń baıaý tómendeýi de áser etedi. Al birqalypty qatań aqsha-kredıt saıasaty ınflıatsııanyń ósýine jol bermeı, baǵanyń ósýin odan ári baıaýlatýǵa yqpal etedi, — dedi Tımýr Súleımenov brıfıngte.
Ulttyq bank 2028 jyly ınflıatsııa 5% deńgeıine jaqyndap, turaqtanady dep boljap otyr.
Tımýr Súleımenov tamyzda jyldyq ınflıatsııanyń 10%-dan tómendeýine júrgizilip otyrǵan aqsha-kredıt saıasaty, sonyń ishinde bazalyq mólsherlemeniń joǵary deńgeıde saqtalýy áser etkenin atap ótti. Degenmen ınflıatsııany kúsheıtýi múmkin faktorlar men táýekelder áli de bar. Sondyqtan bazalyq mólsherlemeni odan ári tómendetý múmkindigi shekteýli.
— Bul júrgizilip otyrǵan aqsha-kredıt saıasatynyń, bazalyq mólsherleme 18% deńgeıinde bolǵan kezeńde qalyptasqan qatań jaǵdaıdyń, sondaı-aq Úkimetpen birlesip qabyldanǵan sharalardyń nátıje berip jatqanyn kórsetedi. Ekonomıka birtindep ınflıatsııanyń baıaýlaý baǵytyna qaıta oralyp keledi. Alaıda qazirgi kórsetkishti túpkilikti nátıje dep qabyldaýǵa áli erte, — dedi ol.
Ulttyq bank tóraǵasynyń aıtýynsha, ınflıatsııanyń qaıta ósýine áser etetin táýekelder el ishinde de, syrtqy ortada da saqtalyp otyr.
Aıta keteıik, buǵan deıin Ulttyq bank bazalyq mólsherlemeni odan ári tómendetý múmkindigi shekteýli ekenin málimdegen edi.
