Ulttyq bank 2026 jylǵa arnalǵan josparlaryn jarııalady
ALMATY. KAZINFORM – QR Ulttyq bankiniń tóraǵasy Tımýr Súleımenov 2026 jyly qarjy sektorynyń damýynyń negizgi baǵyty tsıfrlandyrý bolatynyn málimdedi.
Almatyda ótip jatqan Qazaqstan qarjygerleriniń XIII kongresinde Tımýr Súleımenov Qarjy naryǵyn retteý jáne damytý agenttigi jáne naryq qatysýshylarymen birlesip jumysty tsıfrlandyrýdyń bes jyldyq strategııasy ázirlengenin atap ótti.
– Bul strategııada birqatar naqty shara egjeı-tegjeıli kórsetilgen. Biz ony kezeń-kezeńimen iske asyramyz. 2025 jyldyń sońyna deıin ulttyq krıptorezervtiń memlekettik tsıfrlyq aktıvter qoryn iske qosý josparlanyp otyr. Sonymen qatar biz tsıfrlyq aktıvterdiń ulttyq kastodıaldyq saqtaý júıesin qurýdy bastadyq. El retinde ózimizdiń táýelsiz tsıfrlyq saqtaý júıemiz bolýy tıis. Ol baǵaly qaǵazdardyń Ortalyq depozıtarııi bazasynda qurylady, - dedi Ulttyq bank basshysy.
Onyń aıtýynsha, kelesi kezeń – jasandy ıntellektige kóshý. Ulttyq bank sandyq derekterge negizdelgen ekojúıe quryp jatyr. Qarjy naryǵynyń derekter fabrıkasy iske qosyldy. Alaıaqtyqtyń aldyn alý júıesi úshin antıfrod agentteri, taldaý júrgizýge, valıýtalyq monıtorıngke jáne aqshany jylystatýǵa jáne terrorızmdi qarjylandyrýǵa qarsy is-qımylǵa arnalǵan JI agentteri engizilip jatyr.
– Sondaı-aq biz tsıfrlyq aktıvterge arnalǵan keńistik qalyptastyryp jatyrmyz. Jańa zańda olar qarjy sektorynyń bir bóligi retinde aıqyndalǵan, - dedi ol.
Tımýr Súleımenov baǵaly qaǵazdar naryǵyna nazar aýdarylatynyn atap ótti. Naryq qatysýshylarymen, jetekshi sarapshylarymen jáne halyqaralyq qarjy uıymdarymen birlesip, qor naryǵyn retteýdiń keshendi reformasyn ázirleý úshin tereń taldaý júrgizilmek.
– Kelesi jyly biz baǵaly qaǵazdar naryǵyn keshendi reformalaýǵa kirisemiz. «Astana» halyqaralyq qarjy ortalyǵynda qalyptasqan oń tájirıbeni paıdalanǵymyz keledi. Bizdiń zańnama erekshelikterin eskere otyryp, retteý men quqyq elementterin elimizde iske asyrý boıynsha úlken jumys kútip tur, - dep túsindirdi Tımýr Súleımenov.
Eske salaıyq, Ulttyq bank basshysy bazalyq mólsherleme boıynsha sheshim qabyldaýǵa JI kómektesýi múmkin ekenin aıtty.