Ulttyq bank 20 000 teńgelik banknotany kelesi jyly aınalymǵa shyǵarady
ASTANA. KAZINFORM – Qazaqstanda ulttyq valıýta kýpıýralary tolyq jańartylyp jatyr, al 20 000 teńgelik banknota kelesi jyly aınalymǵa engiziledi. Bul týraly Ulttyq bank tóraǵasy Tımýr Súleımenov málim etti.
Onyń aıtýynsha, qazirgi ýaqytta jańartylǵan banknottardyń ishinde tek 20 teńgelik kýpıýra ǵana aınalymǵa tolyq shyqpaǵan.
– Iá tek jańa 20 000 teńgelik kýpıýra áli shyqqan joq. ıAǵnı ol bizde bar, dızaınyn da kórsetkenbiz. Biraq banknottardy óndirý, bankterdi daıyndaý, bankomat jelilerin beıimdeý sııaqty úderister ýaqyt alady. Sondyqtan 20 myń teńge keıinirek paıda bolady. Al qalǵan banknottardyń barlyǵy qazirdiń ózinde shyǵarylyp, aınalymda júr, - dedi ol.
Sondaı-aq eski serııadaǵy kýpıýralar kezeń-kezeńimen aınalymnan shyǵarylyp jatyr.
– Biz kýpıýralardyń búkil qataryn jańartyp jatqandyqtan, eski serııa birtindep aınalymnan shyǵarylady. Mysaly, 10 000 teńgeniń qoldanylýyn bankter men halyqtyń ótinishi boıynsha bir jylǵa uzarttyq. Qazir olar jańa kýpıýralarmen qatar júr. Bul – qalypty úderis, - dedi Tımýr Súleımenov.
Onyń sózinshe, qalǵan kýpıýralar boıynsha mundaı uzartý qarastyrylmaǵan. Kelesi jyly 20 000 teńgelik banknota aınalymǵa shyqqannan keıin, jańartylǵan kýpıýralar qatary tolyq qalyptasady.
Buǵan deıin 10 000 teńgelik banknotalardyń aınalym merzimi 2027 jylǵa deıin uzartylǵanyn jazǵanbyz.
