Ulttyq baǵalaý ınstıtýty: Qazaqstannyń reıtıngtik agenttigi qurylmaq
ASTANA. KAZINFORM – Kredıttik reıtıngtik agenttikterdiń qyzmetin retteýdiń tolyq tsıkli qalyptastyrylady. Bul týraly Májilistiń jalpy otyrysynda «Reıtıngtik qyzmet týraly» zań jobasyn talqylaý kezinde Qarjy naryǵyn retteý jáne damytý agenttiginiń tóraǵasy Mádına Ábilqasymova málim etti.
- Zań jobasy aıasynda reıtıngtik qyzmetti retteýdiń mynadaı negizgi baǵyttary qarastyrylady. Osy oraıda reıtıngtik qyzmetti júzege asyrý úshin zańnamalyq negizder qurý eskerilgen. Zań jobasynda kredıttik reıtıngtik agenttikterdiń úsh túrin kózdeıtin ınstıtýtsıonaldyq model engiziledi. Birinshiden, táýelsiz ulttyq reıtıngtik baǵalaý ınstıtýty retinde Qazaqstannyń reıtıngtik agenttigin qurý. Onyń aktsıonerleri Ulttyq bank, halyqaralyq reıtıngtik agenttik jáne basqa da qarjy uıymdary bolady. Ulttyq bank agenttiktiń qarjylyq ornyqtylyǵyn jáne qarjy naryǵy tarapynan senimdi qamtamasyz etedi, - dedi M. Ábilqasymova.
Ekinshiden, halyqaralyq reıtıngtik agenttikter qamtylǵan. Bul – Standard&Poor's, Moody's, Fitch agenttikteri men Ekonomıkalyq yntymaqtastyq jáne damý uıymynyń keminde bes eli tanyǵan basqa reıtıngtik agenttikter.
- Sonymen qatar reıtıngtik qyzmetti memlekettik baqylaý men qadaǵalaýdy engizý eskerilgen. Zań jobasynda kredıttik reıtıngtik agenttikterdiń qyzmetin retteý men qadaǵalaýdyń tolyq tsıkli qalyptastyrylady. Agenttikke halyqaralyq jáne sheteldik reıtıngtik agenttikterdi taný, monıtorıngteý jáne tanýdy keri qaıtaryp alý, sondaı-aq reıtıngtik qyzmet týraly zańnama talaptarynyń saqtalýyn baqylaý ókilettikteri beriledi. Naryqqa kirýge ruqsat berý úshin halyqaralyq jáne sheteldik reıtıngtik agenttikterge biliktilik talaptary belgilenedi. Oǵan keminde bes jyl qyzmet tájirıbesi, menshikti kapıtal deńgeıiniń jetkilikti bolýy, tekserýden ótken ádisnamasy jáne ınstıtýtsıonaldyq táýelsizdigi jatady, - dedi Mádına Ábilqasymova.
Onyń sózine qaraǵanda, qazaqstandyq reıtıngtik agenttik úshin jarǵylyq jáne menshikti kapıtaldyń eń tómengi mólsherine qoıylatyn talaptar zańǵa táýeldi deńgeıde belgilenetin bolady. Jarǵylyq kapıtal shamamen 10 mlrd teńgeni quraıdy dep qarastyrylǵan. Bul basqa elderdegi ulttyq reıtıngtik agenttikterdiń praktıkasyna sáıkes keledi.
- Qazaqstandyq reıtıngtik agenttik úshin retteýshige óz qyzmeti týraly aqparatty, onyń ishinde reıtıngter, ádisnamalar jáne tarıhı statıstıka týraly derekterdi berý mindeti engiziledi. Іshki baqylaý jáne táýekelderdi basqarý júıesine qoıylatyn talaptar belgilenedi. Agenttikke qyzmetti tekserý jáne qadaǵalaý sharalaryn qoldaný boıynsha ókilettikter beriledi, - dedi Qarjy naryǵyn retteý jáne damytý agenttiginiń tóraǵasy.
Budan buryn habarlanǵandaı, sońǵy bes jylda aktsııalar naryǵyn kapıtaldandyrý 115%-ǵa ulǵaıyp, 44,7 trln teńgeni qurady.
