Ulttyq antıfrod ortalyǵy 68 mlrd teńge kólemindegi alaıaqtyqtyń aldyn aldy - Ulttyq bank
ASTANA. KAZINFORM – Bul týraly Ulttyq bank tóraǵasy Tımýr Súleımenov Biryńǵaı QR júıesiniń tanystyrylymynda aıtty.
– 2024 jyly Ulttyq antıfrod ortalyǵyn quryp, qazir onyń áleýetin kezeń-kezeńimen kúsheıtip kelemiz. Osy ýaqyt ishinde 165 myń alaıaqtyq jaǵdaı anyqtaldy. Eger olardyń edáýir bóligi iske asqanda, ondaǵan myń azamat qarjylyq shyǵynǵa ushyrar edi. Qazirdiń ózinde Ulttyq antıfrod ortalyǵynyń kómegimen 68 mlrd teńge kólemindegi qarjylyq alaıaqtyqtyń aldyn aldyq, – dedi Tımýr Súleımenov.
Onyń aıtýynsha, bul tek Ulttyq banktiń emes, ekinshi deńgeıli bankterdiń, memlekettik organdardyń jáne basqa da uıymdardyń birlesken jumysynyń nátıjesi.
— Alaıaqtyqpen kúresý úshin barlyq memlekettik jáne memlekettik emes uıymdardyń úılesimdi jumysy qajet. Osy maqsatta Ulttyq antıfrod ortalyǵy bankterdi, quqyq qorǵaý organdaryn jáne ózge de qatysýshylardy bir júıege biriktirip otyr, - dedi spıker.
Eske salaıyq, búginnen bastap bankterdiń basym bóligi biryńǵaı QR júıesin iske qosty.
