Ulttyq antıfrod ortalyǵy 126 mlrd teńgege tosqaýyl qoıdy
ASTANA. KAZINFORM — Ulttyq antıfrod ortalyǵy aıasynda 215 myń alaıaqtyq jaǵdaılar men ózge de zańǵa qaıshy operatsııalar anyqtaldy. Bul týraly Quryltaı otyrysynda «2027-2029 jyldarǵa arnalǵan respýblıkalyq bıýdjet týraly» zań jobasyn tanystyrǵan Ulttyq bank tóraǵasynyń orynbasar Erulan Jamaýbaev aıtty.
— Qarjy sektoryndaǵy tsıfrlandyrý joǵary qarqynmen damyp keledi. Shilde aıynan beri Ulttyq bankaralyq mobıldi tólemder júıesi, onyń ishinde biryńǵaı QR-kod servısi iske qosyldy. Osy az ýaqyt ishinde júıe arqyly 875 mlrd teńgeden astam somaǵa 45 mıllıon operatsııa júrgizildi. Memlekettik qarjy salasynda tsıfrlyq teńgeni paıdalaný keńeıtilip jatyr. Naqty jobalar úshin qazir 350 mlrd-tan astam tsıfrlyq teńge shyǵaryldy. Ulttyq antıfrod ortalyǵy aıasynda 215 myń alaıaqtyq jaǵdaılar men ózge de zańǵa qaıshy operatsııalar anyqtalyp, 126 mlrd teńgedegi somaǵa tosqaýyl qoıyldy, — dedi ol.
UB tóraǵasy orynbasarynyń málimetinshe, jaqynda tsıfrlyq aktıvter aınalymyn keshendi retteý engizilip, tıisti zań qabyldandy.
— Sondaı-aq Memleket basshysynyń krıptoındýstrııany damytý jónindegi jarlyǵyna sáıkes Ulttyq bank Úkimetpen birlesken is-qımyl josparyn qabyldady. — Tsıfrlyq qarjy aktıvterin shyǵarý jáne olarmen jasalatyn operatsııalarǵa qyzmet kórsetý úshin Qazaqstan qor bırjasynda arnaıy tsıfrlyq platforma iske qosyldy. Tórt lıtsenzııalanǵan krıptoprovaıder qazir jumys istep jatyr. Ulttyq bank kólemi 700 mln dollar bolatyn ulttyq krıptorezervti qurdy. Onyń 200 mln dollarǵa jýyq qarajaty ınvestıtsııalandy, — dedi Erulan Jamaýbaev.
Buǵan deıin baǵa turaqtylyǵynda táýekelder saqtalyp otyrǵanyn jazǵan edik.
