«Ulttyq aqparattyq tehnologııalar» basqarma tóraǵasy saılandy
ASTANA. KAZINFORM — Dırektorlar keńesiniń sheshimimen Dáýlet Nysanqululy Bekmanov «Ulttyq aqparattyq tehnologııalar» AQ basqarma tóraǵasy bolyp saılandy.
Dáýlet Bekmanov 1983 jyly dúnıege keldi. Memlekettik qyzmetterdi avtomattandyrý jáne aqparattyq tehnologııalar salasyndaǵy basshylyq pozıtsııalarda 10 jyldan astam jumys tájirıbesin qosa alǵanda, onyń 15 jyldan astam jumys tájirıbesi bar.
2004 jyly «Mıras» jeke ýnıversıtetin «Informatıka» mamandyǵy boıynsha, 2010 jyly M.A. Áýezov atyndaǵy Ońtústik Qazaqstan memlekettik ýnıversıtetin «Memlekettik jáne jergilikti basqarý» mamandyǵy boıynsha bitirgen.
Eńbek jolyn 2005 jyly «Medıa Soft Astana» JShS ınjener-sıstemotehnık laýazymynda bastaǵan. 2006 jyldyń qazan aıynan 2011 jyldyń qazan aıyna deıin Ulttyq muraǵatynyń aqparattyq muraǵattyq tehnologııalar bóliminde maman, «Densaýlyq saqtaýdyń ınvestıtsııalyq jobalaryn basqarý ortalyǵy» JShS jetekshi mamany jáne «Ulttyq aqparattyq tehnologııalar» AQ bas taldaýshysy bolyp jumys istedi.
2011 jyldyń qazanynan 2018 jyldyń qyrkúıegine deıin Baılanys jáne aqparat mınıstrliginde, Kólik jáne kommýnıkatsııalar mınıstrliginde, Baılanys jáne aqparat agenttiginde, Investıtsııalar jáne damý mınıstrliginde, sondaı-aq Aqparat jáne kommýnıkatsııalar mınıstrliginde basshylyq qyzmetter atqardy.
2018 jyldyń qyrkúıeginen 2020 jyldyń aqpanyna deıin «Ulttyq aqparattyq tehnologııalar» AQ basqarma tóraǵasynyń orynbasary.
2020 jylǵy aqpannan 2023 jylǵy mamyrǵa deıin Qazaqstan Respýblıkasy tsıfrlyq damý, ınnovatsııalar jáne aeroǵarysh ónerkásibi mınıstrliginiń Memlekettik qyzmetter komıtetiniń tóraǵasy. Memlekettik qyzmetter salasyndaǵy saıasatty qalyptastyrýǵa, olardy ońtaılandyrý men avtomattandyrýǵa, «Elektrondyq úkimet» portalynyń jumys isteýin qamtamasyz etýge, sondaı-aq Halyqqa qyzmet kórsetý ortalyqtarynyń qyzmetine basshylyq etti.
2023 jylǵy mamyrdan 2025 jylǵy shildege deıin — «Qazposhta» AQ poshta servısi jáne memlekettik qyzmetter jónindegi basqarýshy dırektory. Poshta baılanysy bólimsheleri arqyly memlekettik qyzmet kórsetý jobasyna, aýyldyq bólimshelerdi damytýǵa, sondaı-aq jazbasha hat-habarlar, baspa basylymdary, gıbrıdti elektrondyq poshta jáne arnaıy baılanys salalaryndaǵy jumystardy úılestirýge jaýapty boldy.
Aıta keteıik, saıasat, ekonomıka, bıznes, ǵylym, mádenıet sekildi túrli salada el damýyna eleýli úles qosqan tanymal qazaqstandyqtardyń ómirbaıany men qyzyqty málimetterdi myna jerden oqı alasyz.