Ulttar lıgasy: Qazaqstanmen bir toptaǵy Grýzııa taǵy da jeńdi
ASTANA. QazAqparat - Fýtboldan Ulttar lıgasyndaǵy Qazaqstanmen bir toptaǵy Grýzııa óz alańynda Latvııa quramasyn qabyldady, dep habarlaıdy QazAqparat tilshisi.
Birinshi týrda D lıgasynyń 1-tobynda óner kórsetetin Grýzııa Astanada Qazaqstan quramasyn 2:0 esebimen tize búktirse, Latvııa óz alańynda Andorramen teń tarqasqan edi. Sondyqtan bul kezdesý qos komanda úshin asa mańyzdy edi.
Tartysty órbigen match barysynda alań ıeleriniń basymdylyǵy baıqaldy. Latvııalyqtar ara-tura qarymta shabýylǵa shyǵyp otyrdy.
Kezdesý sońyna taman qonaqtardyń aıyp alańynda grýzııalyq oıynshyny aıaǵynan shalyp qulatty degen sebeppen grekııalyq qazy Anastasıos Papapetrý 11 metrlik penaltı belgiledi. Bul núkteden 77-mınýtta Tornıke Okrıashvılı múlt ketken joq.
Budan keıin latvııalyqtar qanshama alǵa umtylyp baqqanymen, esep ózgergen joq. Ásirese, qosymsha tórt mınýtta úsh márte buryshtamadan dop berilgenimen, odan esh nátıje bolmady. Aıyp soqqysy da dittegen jerine jetken joq.
Latvııa quramasy sapynda Oraldyń «Aqjaıyǵynda» oınaıtyn Artýr Karashaýsks alańǵa shyqty. Ol shabýyldy uıymdastyryp qana qoımaı, buryshtama jáne aıyp doptaryn berip otyrdy. Artýr 68-mınýtta qarsylasyn jeıdesinen tartyp toqtatyp, eskertý de aldy.
Osylaısha qarsylasyn 1:0 esebimen utqan slovakııalyq maman Vladımır Vaıstyń shákirtteri óz tobynda alty upaımen jekedara kósh bastady.
Aıta keteıik, bul topta bolgarııalyq maman Stanımır Stoılov jattyqtyratyn qazaqstandyqtar ekinshi oıynyn 10 qyrkúıek kúni syrt alańda Andorramen ótkizedi. Andorralyqtar ońaı shaǵylatyn jańǵaq emestigin Rıgada bolǵan matchta kórsetti. Óz alańynda Grýzııaǵa ese jibergen Qazaqstan quramasyna upaı aýadaı qajet. Sondyqtan bul kezdesýdiń asa tartysty óteri anyq.
