Ulttar lıgasy: Qazaqstan men Latvııa teń tústi
ASTANA. QazAqparat - Búgin fýtboldan Ulttar lıgasynda úshinshi týr oıyndary ótkizildi. Atalmysh dop dodasynda D dıvızıony birinshi tobynda synǵa túsetin Qazaqstan quramasy syrt alańda Latvııamen kezdesti, dep habarlaıdy QazAqparat tilshisi.
Latvııa quramasy ońaı qarsylas sanalmaıdy. Buǵan deıin talaı qarsylasyna tegeýrindi qarsylyq kórsete bildi. Dese de Ulttar lıgasynda óz jankúıerlerin qýanta almaı keledi. Alǵashqy eki kezdesýde nebári bir upaı ǵana jınaı aldy. Bizdiń jigitter de dál sondaı jaǵdaıdy bastan ótkizip otyr. Ol jaıynda buǵan deıin habarlaǵan edik. Sondyqtan eki qurama úshin de búgingi oıyn asa mańyzdy edi.
Esepti alǵashqy bolyp bizdiń qurama ashty. Bul oıynnyń 16-mınýty bolatyn. Sol qanattan Dmıtrıı Shomko alań ıeleri qaqpasyna áýelete dop bergen edi. Bul múmkindikti qazaqstandyq jartylaı qorǵaýshy Baqtııar Zaınýtdınov paıdalanyp, gol soǵyp ketti. Budan keıin de bizdiń jigitter alań ıeleri qaqpasy mańynda shabýyldy kúsheıte tústi. 26-mınýtta Islambek Qýat aıyp alańy mańynda qaqpaǵa dop baǵyttaǵan edi. Ony latysh qaqpashysy Andrıs Vanın áreń syrtqa shyǵaryp úlgerdi. Qazaqstan quramasynyń alǵashqy kezeńde esepti ulǵaıtýǵa tyrysty. Degenmen oǵan latyshtar da jaýap berip, shabýylǵa shyǵýdy umyta qoıǵan joq. Bizdiń qaqpa mańynda qaýipti sátter bolyp jatty.
Ekinshi kezeńde de bizdiń jigitter alǵa qaraı enteleı tústi. Bizdiń fýtbolshy Evgenıı Postnıkov 48-mınýtta gol soǵatyn tamasha múmkindikti paıdalana almady. Latysh qorǵaýshylary óz aıyp alańynda óreskel qatelik jiberip alǵan edi. Sol sátte Evgenıı Postnıkov urymtal orynda turdy. Dese de onyń qaqpaǵa baǵyttaǵan doby dittegen maqsatyna jete alǵan joq.
Al 63-mınýtta Baýyrjan Islamhannyń tepken doby qaqpadan joǵary tıdi. Budan keıingi sátterde oıyn deńgeıi teńeskendeı boldy. Al 74-mınýtta Abzal Beısebekov gol soǵatyn tamasha múmkindikti múlt jiberdi. Oǵan Roman Murtazaev áýelete ádemi pas shyǵaryp bergen edi. Bul sátte Abzal Beısebekov latysh qaqpashymen betpe-bet shyqty. Ekinshi kezeńde alma-kezek shabýyl kórinis tapqanymen oıyn esebi ózgergen joq. Esep 1:1.
Bul toptaǵy Grýzııa Andorrany 3:0 esebimen tize búktirdi.
Úsh týrdan keıin toǵyz upaı jınaǵan Grýzııa kósh basynda keledi. Qalǵan úsh quramanyń enshisinde eki-ekiden upaı bar. Ár toptan birinshi oryn alǵan quramalar kelesi fýtbol maýsymynda bir lıga joǵary oınaýǵa múmkindik alady.
Bizdiń qurama buǵan deıin Astanada Grýzııaǵa 0:2 esebimen ese jiberse, odan keıin syrt alańda Andorramen 1:1 esebimen teń tústi.
Endi Qazaqstan quramasy 16 qazanda óz alańynda Andorra quramasyn qabyldaıdy.
