Ulttar lıgasy: Qazaqstan men Albanııa alǵash ret teń tústi
NUR-SULTAN. QazAqparat - Dál qazir fýtboldan UEFA Ulttar lıgasynda Qazaqstan quramasynyń óz alańyndaǵy Albanııamen kezdesýi aıaqtaldy, dep habarlaıdy QazAqparat tilshisi.
Qos qurama match barysynda teń dárejede oıyn kórsetti. Birinshi kezeńde ekeýiniń de gol soǵatyn birneshe múmkindigi bolǵan edi. Degenmen ony utymdy paıdalana alǵan joq.
Ekinshi kezeńde quramalar esepti ózgertetin qolaıly sátti izdedi.
Aıta keterligi, Albanııa fýtbolshylarynyń belsendiligi aıqyn ańǵarylyp turdy. Olar gol soǵatyn birneshe múmkindikti qur jiberip aldy. Oıyn 0:0 esebimen teń aıaqtaldy.
Qazaqstan men Albanııa quramalary budan buryn 2006 jylǵy álem chempıonaty irikteý kezeńinde ekinshi topta baq synasty. Qazaqstan quramasy atalǵan qarsylasyna sol joly óz alańynda 0:1, syrt alańda 1:2 esebimen jol berip qoıdy. Osylaısha eki qurama óz tarıhynda tuńǵysh ret teń túsip otyr.
Esterińizge sala ketelik, eki qurama S lıgasy tórtinshi tobynda synǵa túsedi. Atalǵan toptaǵy Lıtva men quramalary búgin ózara sheberlik baıqasady. Ázirge týrnır kestesinde eki qurama tórt upaı jınap, birinshi jáne ekinshi oryndy ózara bólisip tur.
Qazaqstan quramasy budan buryn eki kezdesý ótkizdi. Aldymen 4 qyrkúıekte syrt alańda Lıtvany 2:0 esebimen jeńip, 7 qyrkúıekte óz alańynda Belarýske 1:2 esebimen jeńilip qaldy.
Qazaqstan quramasy endi 14 qazanda Belarýspen syrt alańda oınaıdy.
