Ulttar lıgasy: Qazaqstan quramasynyń múmkindigi qandaı
ASTANA. QazAqparat - Búgin fýtboldan ÝEFA Ulttar lıgasynda D dıvızıonynda birinshi tobynda Qazaqstan quramasy óz alańynda Andorrany qabyldaıdy. Bul tórtinshi týr oıyndary bolmaq, dep habarlaıdy QazAqparat tilshisi.
Andorra fýtboly álemde joǵary baǵalana bermeıdi. Atalmysh memleket Eýropadaǵy shaǵyn eldiń biri sanalady. Onda 85 myńnan astam adam turady. Bul elde fýtbol komandalary da sanaýly. Olardyń barlyǵy derlik áýesqoılyq deńgeıde ekeni belgili. Andorra quramasy halyqaralyq dop dodalaryna 1996 jyldan beri qatysyp keledi. Sol jyly 13 qarashada óz elinde Estonııamen joldastyq kezdesý ótkizip, bul qarsylasynan 1:6 esebimen jeńilip qaldy. Búgingi kúnge deıin barlyǵy 48 joldastyq kezdesý ótkizip, onyń nebári 4-inde ǵana basymdyǵyn kórsetti. Al 12 oıynda teń tússe, qalǵanynda qarsylastaryna jol berdi.
Andorra alǵashqy resmı matchyn 1998 jyldyń 5 qyrkúıeginde syrt alańda Armenııamen ótkizdi. Eýropa birinshiligi irikteý kezeńindegi kezekti oıynda olar 1:3 esebimen jeńilistiń aşy dámin tatty. Sol irikteý kezeńinde birde-bir upaı jınaı almaı, týrnır kestesinde sońǵy orynda qalyp qoıdy. Olarǵa Frantsııa, Ýkraına, Reseı, Islandııa, Armenııa qarsylas boldy. Sodan beri andorralyq fýtbolshylar atalmysh básekeniń irikteý kezeńine tórt márte qatysty. Eshbirinde sońǵy orynnan joǵary kóterile alǵan joq. Bul básekede búginge deıin birde-bir márte upaıǵa qol jetize almaı júr.
Atalmysh qurama álem birinshiliginiń 5 irikteý kezeńinde baq synady. Barlyǵy 52 oıynda 2 márte ǵana jeńiske jetti, 3 ret teń tústi. Qalǵanynda qarsylasy yǵyna jyǵyldy. Alǵash ret 2004 jyldyń 13 qazanynda óz alańynda Maedonııany, 2017 jyldyń 9 maýsymynda Vengrııany 1:0 esebimen tize búktirdi. Álem birinshiligi irikteý kezeńindegi ázirge aýyz toltyryp aıtarlyq tolaıym tabysy osy ǵana bolyp tur.
Qazaqstan men Andorra quramalary 2010 jylǵy álem birinshiligine irikteý kezeńinde altynshy topta joldary túıisti. Eki kezdesýde de bizdiń quramanyń qanjyǵasy maılandy. 2008 jyldyń 20 tamyzynda Almatynyń ortalyq stadıonynda Qazaqstan fýtbolshylary olardy 3:0 esebimen tize búktirse, 2009 jyldyń 9 qyrkúıeginde 3:1 esebimen taǵy da basym tústi.
Andorra ústimizdegi jyly jaqsy oıyn kórsetip keledi. Búgingi kúnge deıin 6 kezdesý ótkizdi. Olardyń 1-de jeńiske jetse, 1-de qarsylasyna ese jiberip, qalǵanynda teń nátıje tirkeldi. Bul buryn jeńilisten únemi kóz ashpaıtyn qurama úshin joǵary jetistik. Teń oıynnyń ishinde bizdiń Qazaqstanmen osy Ulttar lıgasyndaǵy alǵashqy kezdesýi de bar.
Esterińizge sala ketelik, ústimizdegi jyldyń 10 qyrkúıeginde qos qurama 1:1 esebimen upaı bólisken edi.
Bizdiń qurama budan basqa eki oıyn ótkizdi. Aldymen Astanada Grýzııaǵa 0:2 esebimen ese jiberse, 13 qazanda syrt alańda Latvııamen 1:1 esebimen teń tústi.
Bizdiń topta Grýzııa quramasy kósh bastap keledi. Olardyń enshisinde 9 upaı bar. Al qalǵan quramalar eki-ekiden upaıdan alǵan. Toptaǵy birinshi oryn Grýzııaǵa buıyratyn sekildi. Óıtkeni, olar men qalǵan quramalar arasyndaǵy upaı aıyrmasy edáýir alshaq.
Qazaqstan men Andorra quramalary arasyndaǵy kezdesý Astana ýaqytymen saǵat 20-00-de bastalady. Oıyn Qazsport telearnasynan tikeleı efırde kórsetiledi.
Sondaı-aq, búgin osy toptaǵy Latvııa men Grýzııa sheberlik baıqasady. Kezdesý 00-45-te bastalady.
