Ulttar lıgasy: Qazaqstan quramasy jańa týrnırde jeńimpaz bola ala ma

Esterińizge sala ketelik, Qazaqstan quramasy D lıgasynda oıyn kórsetedi. Onda reıtıngisi tómen komandalar baq synaıdy. Bizdiń quramaǵa qarsylastar - Grýzııa, Latvııa jáne Andorra quramalary. Sondaı-aq, atalmysh lıgada 2 topta Moldavııa, Belarýs, Lıýksembýrg jáne San-Marıno, 3 topta Ázerbaıjan, Malta, Farer araldary jáne Kosovo, 4 topta Armenııa, Makedonııa, Lıhtenshteın jáne Gıbraltar quramalary synǵa túsedi. 

2018 jyldyń qyrkúıek pen qarasha aılary aralyǵynda qatysýshylar bir-birimen óz jáne syrt alańda oınaıdy. Osylaısha, komandalar halyqaralyq fýtbol kúntizbesine saı tórt nemese alty match ótkizedi. Top jeńimpazdarynyń klasy joǵarylaıdy, al sońǵy oryn alǵandary kelesi jarysty tómengi lıgadan bastaıdy. Árbir topta jeńimpaz bolǵan quramalar joǵarylaıdy. Sońǵy oryn alǵandary kelesi jarysty tómengi lıgalardan bastaıdy. 

Endigi kezekte búgingi qarsylasymyz - Grýzııa quramasy jaıynda toqtala ketelik. Kezinde Eýropanyń bedeldi klýbtarynda dop tepken Shota Arveladze, Georgıı Demetradze, Kahaber Kaladze sııaqty talanttar shyqqan qurama búginde ondaı deńgeıde kórine almaı keledi. Sondyqtan, reıtıngisi tómen quramalar qataryna qosylyp otyr. 

1990 jylǵa deıin grýzın fýtbolshylary KSRO quramasy sapynda oıyn kórsetti. 1990 jyldyń 27 mamyrynda Grýzııa quramasy alǵashqy halyqaralyq kezdesýin Lıtva quramasyna qarsy ótkizdi. Oıyn el astanasy - Tbılısı qalasyndaǵy Borıs Paıchadze stadıonynda ótti. Bul oıynda qos qurama 2:2 esebimen teń tústi. 

Grýzııa alǵashqy resmı kezdesýi 1994 jyldyń 7 qyrkúıeginde boldy. 1996 jylǵy Eýropa birinshiligine irikteý kezeńi aıasynda Moldavııa quramasyn qabyldady. Bul oıynda grýzınder 0:1 esebimen jeńildi. Dese de, sol irikteý kezeńinde búgingi qarsylasymyz óz tobynda úshinshi oryn alyp, Moldavııa, Albanııa jáne Ýels quramalaryn artta qaldyrdy. Ekinshi oryndaǵy Bolgarııany jeti upaı alǵa jiberdi. 

Al 1998 jylǵy álem birinshiligine irikteý kezeńinde óz tobynda tórtinshi oryn aldy. Qurama qorjynynda 10 upaı bar. Olar Polsha quramasymen birdeı upaı jınady. Degenmen, dop aıyrmasy boıynsha ǵana alǵa salyp qoıdy. Sol kezeńde grýzııalyq qurama FIFA reıtınginde 42-orynǵa taban tiredi. Bul ázirge qurama tarıhyndaǵy eń úzdik kórsetkish bolyp tabylady. 

Odan keıingi kezeńderde olar mundaı deńgeıde kórine almaı keledi. 2000 jylǵy Eýropa birinshiligine irikteý kezeńinde óz tobynda kósh sońynda qalyp qoıdy. Onda nebári 3 upaı ǵana jınady. Al 2010 jylǵy álem birinshiligine irikteý kezeńinde eń tómengi kórsetkishke quldılady. Birde-bir kezdesýinde úsh upaıdy qorjynǵa sala alǵan joq. 

FIFA-nyń sońǵy reıtınginde Grýzııa 96-orynda tur. Al Qazaqstan quramasy 116-orynda keledi. Qazirgi tańda qurama sapynda Eýropa komandalarynda baq synap júrgender az emes. Dese de, olardyń barlyǵy kári qurlyqtyń ortanqol birinshilikteri ekenin jankúıerler jaqsy biledi. Reseı, Ýkraına, Shveıtsarııa, Avstrııa, Polsha elderinde dop teýip júrgender kóp. Tipti, atalmysh qurama sapyndaǵy Djaba Kankava, Nıka Kvekveskırı Qostanaıdyń «Tobyl», Djambýl Djıgaýrı «Aqtóbe» namysyn qorǵaıdy. 

Qazir Grýzııa quramasynyń bas bapkeri qyzmetin Vladımır Vaıss atqarady. Slovak mamany bizdiń qazaqstandyq jankúıerlerge jaqsy tanys. Ol 2013-2015 jyldarda Almatynyń «Qaırat» komandasyna jetekshilik etti. 

Qos qurama budan buryn 4 márte kezdesti. Onyń 2-eýi teń aıaqtalsa, qos qurama bir-birden jeńiske jetken. Alǵashqy eki oıyn 2006 jylǵy álem birinshiliginiń irikteý kezeńinde boldy. 2005 jyldyń 17 tamyzynda Almatyda Grýzııa quramasy Qazaqstandy 2:1 esebimen tize búktirse, sol jyldyń 8 qazanynda bizdiń jigitter olarmen 0:0 esebimen teń tústi. Qazaqstan quramasy odan keıin araǵa segiz jyldaı salyp Grýzııamen joldastyq oıynda qaıta kezdesti. 2013 jyldyń 14 tamyzynda Astanada bolǵan oıynda bizdiń qurama olardan 1:0 esebimen basym tústi. Al 2016 jyldyń 29 naýryzynda Tbılısıde bolǵan joldastyq oıynda qos qurama 1:1 esebine qanaǵat bildirdi. 

Aldaǵy oıyn jaıynda Grýzııa quramasynyń bas bapkeri Vladımır Vaıss bylaı dedi:

«Grýzııa men Qazaqstandy basty favorıt sanaý erterek. Latvııa men Andorra da ózderiniń sheberligin kórsetýge tyrysady».

Al Qazaqstan quramasynyń bas bapkeri Stanımır Stoılov «Men óz shákirtterime senemin. Quramanyń sońǵy úsh oıyny bizdiń jigitterdiń deńgeıin tarazylap berdi» dedi.

Aıta ketelik, bıyl Qazaqstan quramasy S. Stoılovtyń jetekshiligimen úsh joldastyq kezdesý ótkizdi. Vengrııa jerinde 23 jáne 26 naýryzda atalmysh eldiń quramasyn 3:2 esebimen tize búktirip, odan keıin Bolgarııaǵa 1:2 esebimen ese jiberdi. Al 5 maýsymda Astanada Ázerbaıjandy 3:0 esebimen oısyrata jeńdi. 

Qazaqstan men Grýzııa quramalary arasyndaǵy kezdesý Astana ýaqytymen 20.00-de bastalady. Oıyn «Astana-arena» stadıonynda bolady. Kezdesý «Qazsport» telearnasynan tikeleı efırde kórsetiledi. Sondaı-aq, búgin osy toptaǵy Latvııa men Andorra quramalary ózara sheberlik baıqasady.