Ulttar lıgasy: Qazaqstan quramasy Lıtvadan basym tústi
NUR-SULTAN. QazAqparat - Búgin UEFA Ulttar lıgasyndaǵy alǵashqy oıynynda Qazaqstan quramasy syrt alańda Lıtvadan basym tústi, dep habarlaıdy QazAqparat tilshisi.
Esterińizge sala ketelik, qazaqstandyq qurama S lıgasynyń tórtinshi tobynda oınaıdy. Qarsylastary - Albanııa, Belarýs jáne Lıtva quramalary.
Lıtva quramasy sapyndaǵy fýtbolshylardyń basym bóligi óz eliniń chempıonatynda oınaıdy. Sondaı-aq, Bolgarııa, Izraıl, Italııa, Latvııa, Polsha, Serbııa, Estonııa, Horvatııa chempıonattarynda baq synap júrgen fýtbolshylar bar. Al úsh fýtbolshy Qazaqstan Premer-lıgasynda oıyn kórsetedi. Atap aıtqanda, Petropavldyń «Qyzyljarynda» Vıtaýtas Andrıýshkıavıchıýs, Taldyqorǵannyń «Jetisýynda» Artýras Jýlpa, Jambyl oblysynyń «Tarazynda» Ovıdııýs Verbıtskas bar.
Kezdesý Qazaqstan quramasy úshin sátti bastaldy deýge bolady. Alǵashqy mınýttarda olar aldyńǵy shepte jıi boı kórsetti. Osyndaı sátterdiń birinde qarsylastar qaqpasynan sańylaý tapty. Baktııor Zaınýtdınov 3-mınýtta gol soǵyp ketti.
Ekinshi kezeńde qazaqstandyq qurama negizinen qorǵanysqa kóbirek kóńil bóldi. Alań ıeleri gol soǵatyn múmkindikterdi izdedi. Degenmen olar 86-mınýtta ózderiniń qaqpasyna taǵy bir gol jiberip aldy. Ony qazaqstandyq jartylaı qorǵaýshy Islambek Qýat óziniń enshisine jazdy. Osylaısha Qazaqstan quramasy qarsylasynan 2:0 esebimen basym tústi.
Eki qurama buǵan deıin bir márte ǵana kezdesti. 2014 jyldyń 5 naýryzynda Túrkııanyń Antalıa qalasynda ótken joldastyq kezdesýde ekeýi 1:1 esebine qanaǵat bildirip tarqasty. Sol sebepti búgingi oıyn tuńǵysh resmı kezdesý sanalady.
Búgin tórtinshi topta taǵy bir oıyn ótkizedi. Belarýs quramasy óz alańynda Albanııany qabyldaıdy.
