Ulttar lıgasy: Qazaqstan quramasy birinshi kezeńde Lıtvany jeńdi
NUR-SULTAN. QazAqparat - Búgin UEFA Ulttar lıgasynda synǵa túsip jatqan Qazaqstan quramasynyń syrt alańdaǵy Lıtvamen kezdesýiniń birinshi kezeńi aıaqtaldy, dep habarlaıdy QazAqparat tilshisi.
Esterińizge sala ketelik, qazaqstandyq qurama S lıgasynyń tórtinshi tobynda oınaıdy. Qarsylastary - Albanııa, Belarýs jáne Lıtva quramalary.
Búgingi kezdesý qazaqstandyq fýtbolshylar úshin sátti bastaldy. Oıynnyń 3-mınýtynda Baktııor Zaınýtdınov áriptesi Baýyrjan Islamhannyń bergen pasymen gol saldy.
Osylaısha, birinshi kezeńde qazaqstandyq qurama 1:0 esebimen jeńiske jetti.
FIFA-nyń aı saıyn jarııalanatyn reıtınginde Lıtva quramasy qazir 131-orynda tur. Al Qazaqstan ol reıtıngte 118-orynda keledi. Eki qurama buǵan deıin bir márte ǵana kezdesti. 2014 jyldyń 5 naýryzynda Túrkııanyń Antalıa qalasynda ótken joldastyq kezdesýde ekeýi 1:1 esebine qanaǵat bildirip tarqasty. Sol sebepti búgingi oıyn tuńǵysh resmı kezdesý sanalady.
