Ulttar lıgasy: Qazaqstan quramasy Belarýsten ese qaıtara ala ma
NUR-SULTAN. QazAqparat - Búgin UEFA Ulttar lıgasynyń ekinshi týrynda Qazaqstan quramasy óz alańynda Belaarýsty qabyldaıdy, dep habarlaıdy QazAqparat tilshisi.
Esterińizge sala ketelik, Qazaqstan S lıgasynyń tórtinshi tobynda synǵa túsedi. Qarsylastary - Albanııa, Belarýs jáne Lıtva quramalary.
Qazaqstandyq qurama 4 qyrkúıekte syrt alańda Lıtvany 2:0 esebimen jeńip qaıtty. Osylaısha dop dodasyn sátti bastady. Al Belarýs óz alańynda Albanııaǵa 0:2 esebimen ese jiberdi. Týrnır kestesinde qazaqstandyq fýtbolshylar Albanııa quramasy ekeýi alǵashqy eki oryndy ózara bólisip tur.
Búgingi qarsylas - Belarýs quramasy qazaqstandyq jankúıerlerge jaqsy tanys. Eki qurama buǵan deıin úsh márte jasyl alańda kezdesken. Alǵashqyda olardyń joly 2010 jylǵy Eýropa chempıonatyna irikteý satysynda túıisti. 2009 jyldyń 1 sáýirinde Almatyda ótken oıynda qazaqstandyq qurama atalǵan qarsylasyna 1:5 esebimen jol berdi. Al sol jyldyń 10 qazanynda Belarýstyń Brest qalasyndaǵy kezdesýde alań ıeleri Qazaqstan quramasynan 4:0 esebimen basym tústi.
Belarýs fýtbol federatsııasy 1989 jyly qurylǵan. 1992 jyly FIFA músheligine qabyldansa, 1993 jyldan bastap UEFA quramynda baq synap keledi. Sodan bergi ýaqytta atalǵan qurama joǵary jetistigimen kózge túse qoıǵan joq. Eýropa qurlyǵyndaǵy ortanqol qurama qatarynda sanalady. Ulttar lıgasynyń 2018/2019 jylǵy maýsymynda D lıgasynyń ekinshi tobynda Lıýksembýrg, Moldavııa jáne San-marınomen synǵa túsken belarýstik fýtbolshylar birinshi orynǵa ıe boldy.
Belarýs quramasynda negizinen jergilikti chempıonatta oıyn kórsetetin fýtbolshylar sany basym. Sondaı-aq, quramda Reseıdiń «Krasnodarynyń» namysyn qorǵap júrgen Aleksandr Martynovıch, «Ýral» klýbynda dop tebetin Nıkolaı Zolotov, Týlanyń «Arsenalynyń» oıynshysy ıÝrıı Kovalev, «Lokomotıv» shabýylshysy Vıtalıı Lısakovıch bar. Sondaı-aq, qazaqstandyq klýbtarda dop tebetin Nıkıta Naýmov («Jetisý») pen Maks Ebong («Astana») bar.
Qazaqstan men Belarýs quramalary arasyndaǵy kezdesý Almaty qalasynda 7 qyrkúıekte elorda ýaqytymen 20.00-de bastalady. Oıyn Qazsport telearnasynda tikeleı efırde kórsetiledi.
