Ulttar lıgasy: Qazaqstan Albanııaǵa ese jiberdi
NUR-SULTAN. QazAqparat - Dál qazir UEFA Ulttar lıgasyndaǵy Qazaqstan men Albanııa quramalary arasyndaǵy kezdesý aıaqtaldy, dep habarlaıdy QazAqparat tilshisi.
Esterińizge sala ketelik , eki qurama S lıgasy tórtinshi tobynda synǵa túsedi. Olardan ózge Belarýs jáne Lıtva quramalary bar.
Búgingi kezdesýde albanııalyq fýtbolshylar ózderine senimdi oıyn kórsetti. Nátıjesinde 16-mınýtta Sokol Chıkapeshı esep ashty. Al 23-mınýtta Ardıan Ismaılı esepti ústemeleı tústi.
Budan keıin qyzyq jaǵdaı oryn aldy. Oıyndy alań ortasynan bastaǵan Aıbol Ábiken dopty qarsylastar qaqpasyna áýelete tepti. Oǵan albanııalyq qaqpashy Etrıt Berısha qaýqar kórsete alǵan joq.
Ekinshi kezeńde qazaqstandyq fýtbolshylar tarazy basyn teńestirýge umtyldy. Degenmen óz aıyp alańynda ereje buzyp, Stas Pokatılov qaqpasyna penaltı belgilendi. Ony Reıý Manaı múlt jibergen joq.
Búgin atalǵan toptaǵy Belarýs óz alańynda Lıtvany 2:0 esebimen jeńdi.
Bes týrdan keıin 10 upaımen Belarýs kósh bastap tur. Odan keıingi oryndaǵy Albanııanyń 8, Lıtvanyń 5 upaıy bar. Tórtinshi oryndaǵy Qazaqstan enshisinde 4 upaı jazylǵan.
Endi Qazaqstan quramasy 18 qarashada óz alańynda Lıtvany qabyldaıdy. Ekeýi aldaǵy ýaqytta D lıgasyna túsetin sońǵy oryndaǵy quramany anyqtaıdy.
