Ulttar lıgasy: Qazaqstan Albanııadan qarymta qaıtara ala ma
QYZYLORDA. QazAqparat - Búgin fýtboldan UEFA Ulttar lıgasynda Qazaqstan quramasy óz alańynda Albanııamen sheberlik baıqasady, dep habarlaıdy QazAqparat tilshisi.
Kezdesý elorda ýaqytymen 19.00-de bastalyp, «Qazsport» telearnasynan tikeleı efırde kórsetiledi.
Esterińizge sala ketelik, eki qurama S lıgasy tórtinshi tobynda synǵa túsedi. Olardan ózge Belarýs jáne Lıtva quramalary bar.
Atalǵan qurama 1929 jyldan beri túrli saıystarda oıyn kórsetip keledi. Degenmen FIFA-ǵa 1932, UEFA quramyna 1954 jyly qabyldandy. 2016 jyly óz tarıhynda tuńǵyş ret Eýropa chempıonaty fınaldyq kezeńinde baq synady. Óz tobynda úshinshi oryn alyp, jarystyń kelesi satysyna shyǵa alǵan joq. FIFA jarııalaǵan sońǵy reıtıngte Qazaqstan 118, Albanııa 66 orynda tur.
Albanııa quramasy sapynda Eýropadaǵy beldi klýbtarda synǵa túsip júrgen fýtbolshylar az emes. Olardyń qatarynda Italııanyń SPAL, «Latsıo», «Atalanta», «Empolı», «Peskara» komandalarynda oınaıtyn qaqpashylar - Etrıt Berısha, Tomas Strakosha, qorǵaýshylar – Berat Djımsıtı, Frederık Veselı, jartylaı qorǵaýshylar – Ledıan Memýshaı bar. Sondaı-aq, Ispanııanyń «Malagasynda» jartylaı qorǵaýshy Keıdı Bara, «Albasetede» shabýylshy Reı Manaı syndy fýtbolshylar oıyn kórsetedi. Nıderlandy, Reseı, Avstrııa, Slovakııa, Túrkııa, Shveıtsarııa, Germanııa, Danııa, Grekııa, Fınlıandııa elderinde dop tebetin fýtbolshylar da ulttyq qurama sapyna shaqyrý alǵan.
Qazaqstan men Albanııa quramalary budan buryn 2006 jylǵy álem chempıonaty irikteý kezeńinde ekinshi topta baq synasty. Aldymen 2004 jyldyń 13 aqpanynda Almatyda ótken kezdesýde qazaqstandyq qurama qarsylasyna 0:1 esebimen jol berip qoıdy. Al 2005 jyldyń 9 qyrkúıeginde syrt alańda qazaqstandyqtar 1:2 esebimen jol berip qoıdy. Qazaqstan quramasy sol ketken eseni qaıtara ala ma?
Qazaqstan quramasy budan buryn eki kezdesý ótkizdi. Aldymen 4 qyrkúıekte syrt alańda Lıtvany 2:0 esebimen jeńip , 7 qyrkúıekte óz alańynda Belarýske 1:2 esebimen jeńilip qaldy.
