Ulttar lıgasy: Qazaqstan Albanııadan ese qaıtara ala ma
NUR-SULTAN. - QazAqparat - Búgin fýtboldan UEFA Ulttar lıgasynda Qazaqstan quramasy syrt alańda Albanııamen sheberlik baıqasady, dep habarlaıdy QazAqparat tilshisi.
Kezdesý búgin, 15 qarashada elorda ýaqytymen 22.50-de bastalyp, «Qazsport» telearnasynan tikeleı efırde kórsetiledi.
Esterińizge sala ketelik, eki qurama S lıgasy tórtinshi tobynda synǵa túsedi. Olardan ózge Belarýs jáne Lıtva quramalary bar.
Alǵashqy tórt týrdan keıin Belarýs jeti upaımen kósh bastap tur. Odan keıingi oryndardaǵy Albanııa men Lıtva quramalarynyń enshisinde bes-besten upaı bar.
Qazaqstan quramasy budan burynǵy oıyndarda 1 márte jeńiske jetip, 1 márte teń túsip, 2 oıynda qarsylastaryna ese jiberip qoıdy. Aldymen 4 qyrkúıekte syrt alańda Lıtvany 1:0 esebimen jeńip, 7 qyrkúıekte óz alańynda Belarýsten 1:2 esebimen jeńildi. Odan keıin óz alańynda Albanııamen 0:0 esebimen teń túsip, syrt alańda Belarýsten 0:2 esebimen súrindi.
Qazaqstan men Albanııa quramalary UEFA Ulttar lıgasyna deıin eki márte kezdesti. Aldymen eki qurama 2006 jylǵy álem chempıonaty irikteý kezeńinde ekinshi topta baq synasty. 2004 jyldyń 13 aqpanynda Almatyda ótken kezdesýde qazaqstandyq qurama qarsylasyna 0:1 esebimen jol berip qoıdy. Al 2005 jyldyń 9 qyrkúıeginde syrt alańda qazaqstandyqtar 1:2 esebimen jeńildi.
Albanııa quramasy 1929 jyldan beri túrli saıystarda oıyn kórsetip keledi. Degenmen FIFA-ǵa 1932, UEFA quramyna 1954 jyly qabyldandy. 2016 jyly óz tarıhynda tuńǵysh ret Eýropa chempıonatynyń fınaldyq kezeńinde baq synady. Óz tobynda úshinshi oryn alyp, jarystyń kelesi satysyna shyǵa alǵan joq. FIFA jarııalaǵan sońǵy reıtıngte Qazaqstan 118, Albanııa 69 orynda tur.
