Ulttar lıgasy: Fınalda synǵa túsetin quramalar tolyq anyqtaldy
ASTANA. QazAqparat - Fýtboldan Ulttar lıgasy týrnıriniń fınaldyq kezeńinde synǵa túsetin quramalar tolyq anyqtaldy, dep habarlaıdy QazAqparat tilshisi.
Atalmysh dop dodasy 2019 jyldyń 5-9 maýsym aralyǵynda Portýgalııada ótkiziledi. Onda A lıgasynda óz toptarynda birinshi oryn alǵan quramalar qatysady. Atap aıtqanda, Gollandııa, Shveıtsarııa, Portýgalııa jáne Anglııa quramalary ózara myqtyny anyqtaıdy.
Ulttar lıgasy fınaldyq satysynyń jerebesi ústimizdegi jyldyń 3 jeltoqsanynda tartylady. Jarys jartylaı fınal, úshinshi oryn úshin saıys jáne fınaldan turady.
A lıgasynda óz toptarynda sońǵy oryn alǵan Germanııa, Polsha, Horvatııa jáne Islandııa quramalary V lıgasyna túsip qaldy.
Ulttar lıgasynyń sońǵy oıyndary búgin oınalady.
Budan buryn Ulttar lıgasynyń talaby men tártibi jóninde habarlaǵan edik.
Qazaqstan quramasy atalmysh dop dodasynyń D lıgasy birinshi tobynda synǵa tústi. Barlyǵy 6 oıyn ótkizip, onyń biri jeńispen aıaqtaldy, úsheýinde teń nátıje tirkelse, eki oıynda qarsylasyna ese jiberdi. Alǵashqy týrda óz alańynda Grýzııadan 0:2 esebimen jeńilse, odan keıin aldymen Andorra, sosyn Latvııamen 1:1 esebimen teń nátıje tirkeldi. Al tórtinshi týrda elordada Andorrany 4:0 esebimen jeńgenimen, besinshi týrda óz alańynda Latvııamen taǵy da 1:1 esebimen teń tústi. Sońǵy oıynda syrt alańda Grýzııaǵa 1:2 esebimen ese jiberdi.
