Ulttar lıgasy: Ekinshi oryn kimge buıyrmaq
ASTANA. QazAqparat - Búgin, 15 qarashada fýtboldan Ulttar lıgasynyń 5-týr oıyndary bastalady. Atalmysh básekede D lıgasynyń birinshi tobynda synǵa túsetin Qazaqstan quramasy óz alańynda Latvııany qabyldaıdy, dep habarlaıdy QazAqparat tilshisi.
Bizdiń qurama kelesi joly da D lıgasynda baq synaıtynyn bilemiz. Óıtkeni, bizdiń toptan jarysty jalǵastyrý múmkindigine Grýzııa fýtbolshylary eki týr buryn qol jetkizip qoıdy. Sondyqtan endi bizdiń óz tobymyzda kem degende ekinshi oryn alý úshin búgingi oıynda jeńiske jetýimiz óte mańyzdy. Ekinshi oryn Qazaqstan men Latvııanyń birine buıyrýy múmkin. Búgingi kezdesýde sol saýaldyń jaýabyn sheshiledi. Sebebi, qaı qurama jeńiske jetse, sol ekinshi orynǵa jaıǵasady. Al Qazaqstan kelesi týrda Grýzııamen, Latvııa Andorramen syrt alańda kezdesedi. Qysqasy, bizden góri Latvııaǵa upaı qoryn tolyqtyrýǵa múmkindik zor.
Eki qurama 13 qazanda Latvııada bir oıyn ótkizdi. Bul kezdesýde olar 1:1 esebin qanaǵat tutty. Odan keıin bizdiń jigitter óz alańynda Andorrany 4:0 esebimen oısyrata jeńdi. Al Latvııa óz alańynda Grýzııadan 0:3 esebimen súrindi.
Qazaqstan quramasy Latvııamen oıynnyń aldynda birqatar fýtbolshylar kómegine júgine almaıtyn boldy. Solardyń biri - Reseıdiń «Ýfa» komandasynyń jartylaı qorǵaýshysy Erkebulan Seıdahmet jaraqattanyp qaldy. Sondaı-aq, Evgenıı Postnıkov, Dmıtrıı Shomko, ıAn Vorogovskıı de atalmysh matchqa qatyspaıdy. Olardyń ornyna ıÝrıı Pertsýh, Oralhan Ómirtaev jáne Ivan Antıpov shaqyryldy.
Latvııa quramasynyń bas bapkeri Mıksý Paatelaınen aldaǵy oıynǵa daıyndyq barysy jaıynda aıtyp ótti. Ol bizdiń jigitter óte jyldam qımyl kórsete alatynyna nazar aýdardy. Sondyqtan aldaǵy kezdesýde tartysty báseke órbıtinine úmit artty.
Eki komanda buǵan deıin alty márte sheberlik baıqasqan. Qazaqstan 2016 jyly 13 qazanda Eýropa birinshiligine irikteý kezeńinde syrt alańda atalmysh qarsylasyn 1:0 esebimen tize búktirip qaıtty. Latyshtar 2002, 2004 jyldarda joldastyq kezdesýlerde bizdiń quramany jeńdi. Qýanyshtysy, sońǵy tórt kezdesýde bizdiń qurama olarǵa ese jiberip kórgen joq. Sol sebepti búgin bizdiń jigitter jankúıer qaýymǵa qýanysh syılaıdy degen úmittemiz.
Qazaqstan men Latvııa quramalary arasyndaǵy kezdesý Astana ýaqytymen 21-00-de bastalady. Oıyn tikeleı efırde «Qazsport» telearnasynan kórsetiledi.
