Ulttar lıgasy: Qazaqstan men Norvegııa teń nátıjege qanaǵat bildirdi
ASTANA. KAZINFORM - Búgin, 6 qyrkúıekte Qazaqstan quramasy UEFA Ulttar lıgasyndaǵy alǵashqy oıynyn Norvegııaǵa qarsy ótkizdi.
El quramasy V lıgasy úshinshi tobynda Norvegııa, Slovenııa jáne Aýstrııa quramalarymen synǵa túsedi.
Búgingi kezdesýde Qazaqstan quramasynyń bas bapkeri Stanıslav Cherchesov alǵashqy mınýttan sheteldik klýbtarda oınap júrgen Nuraly Álip, Baktıer Zaınýtdınov, Ramazan Orazov, Abat Aıymbetov syndy fýtbolshylardy negizgi quramda alańǵa shyǵardy. Qurama úzdikteri Baýyrjan Islamhan, Aıbol Ábiken, Abzal Beısebekov jáne jaraqatyna baılanysty Maksım Samorodov qosalqy quramda qaldy.
Al, Norvegııa sapynda álem fýtbolynyń jaryq juldyzdary Erlıng Holand («Manchester Sıtı», Anglııa) pen Martın Edegor («Arsenal», Anglııa) alǵashqy mınýttan oıynǵa aralasty.
Birinshi kezeńde norvegııalyq fýtbolshylar tizgindi óz qolynda ustaýǵa tyrysty. Olar shabýyl shebinde jıi boı kórsetti. Dese de Igor Shatskıı qorǵaǵan qaqpaǵa aıtarlyqtaı qaýip tóndire qoıǵan joq. Qazaqstandyq qurama negizinen qorǵanysqa kóbirek kóńil bóldi.
Ekinshi kezeń bastalǵannan Erlıng Holand pen onyń komandalas áriptesteri alǵa qaraı umtyldy. Dese de dittegen maqsatyna jete almaı jatty. Keıbir sátte qazaqstandyq fýtbolshylardyń da gol soǵatyn múmkindigi boldy. Qos qurama 0:0 esebine qanaǵat bildirip, teń tarqasty.
Endi el quramasy 9 qyrkúıekte syrt alańda Slovenııamen sheberlik baıqasady.
