Ulttar lıgasy: Qazaqstan quramasynyń oıyn kestesi anyqtaldy
ASTANA. KAZINFORM - Fýtboldan UEFA Ulttar lıgasy 2026/2027 jylǵy maýsymyndaǵy Qazaqstan quramasynyń oıyn kestesi belgili boldy.
Otandastarymyz S lıgasynyń úshinshi tobynda synǵa túsedi.
Qarsylastary - Slovakııa, Moldova jáne Farer araldary.
Qazaqstandyq fýtbolshylar alǵashqy oıynyn 26 qyrkúıekte ótkizse, sońǵy týr 16 qarashaǵa belgilengen. Árbir qurama týrnır barysynda bir qarsylasymen eki oıynnan ótkizedi.
Oıyndar kestesi
26 qyrkúıek. 21:00. Farer araldary - Qazaqstan
29 qyrkúıek. 23:45. Slovakııa - Qazaqstan
2 qazan. 19:00. Qazaqstan - Moldova
6 qazan. 19:00. Qazaqstan - Farer araldary
13 qarasha. 22:00. Moldova - Qazaqstan
16 qarasha. 20:00. Qazaqstan - Slovakııa.
Qazaqstandyq fýtbolshylar 2024/25 jylǵy maýsymda V lıgasynda úshinshi topta alty kezdesýdiń beseýinde jeńilip, bireýinde teń oınady. Saldarynan óz tobynda tórtinshi oryndy mise tutyp, qaıtadan S lıgasyna túsip qaldy.
Eske salsaq, budan buryn 2028 jyldan keıin UEFA Ulttar lıgasynyń formaty ózgeredi.
UEFA Atqarýshy komıteti Túrkııanyń Ystanbul qalasynda ótken otyrysynda erler arasyndaǵy ulttyq quramalarǵa arnalǵan týrnırlerdiń jańa tujyrymdamasyn maquldady.
Ulttar lıgasy men Eýropa chempıonaty irikteý kezeńiniń jańartylǵan formaty 2028 jylǵy qurlyqtyq dodadan keıin engiziledi.
2028/29 jylǵy maýsymnan bastap Ulttar lıgasy árqaısysynda 18 quramadan turatyn úsh lıga formatyna kóshedi. Ár lıga alty qomandadan quralǵan úsh topqa bólinedi. Buryn quramalar tórt lıgadan turatyn dop dodasynda baq synaıtyn edi.
