Ulttar lıgasy: Qazaqstan quramasy qandaı nátıje kórsetedi
ASTANA. KAZINFORM - Búgin fýtboldan Qazaqstan quramasy UEFA Ulttar lıgasyndaǵy alǵashqy oıynyn Norvegııaǵa qarsy ótkizedi. El quramasy atalǵan synda qalaı oıyn kórsetedi? Múmkindigimiz qandaı? V lıgasyndaǵy ornymyzdy saqtap qala alamyz ba? Fýtbolshylardyń daıyndyǵy qalaı? Kazinform tilshisi ulttyq quramanyń atalǵan týrnırdegi oıyn kórsetý múmkindigin tarazylap kórdi.
Tájirıbeli qarsylastarmen baq synaımyz
Bıyl Ulttar lıgasy tórtinshi márte jalaýyn kóterdi. Aıta keterligi, el quramasy onda ártúrli deńgeıde oıyn kórsetti. 2018/19 jylǵy maýsymda qazaqstandyq fýtbolshylar D lıgasy birinshi tobynda baq synady. Onda el quramasy Grýzııaǵa 0:2, 1:2 esebimen ese jiberse, Latvııamen eki márte 1:1 esebine qanaǵat bildirdi. Al Andorramen syrt alańda 1:1 esebimen teń oınasa, óz alańynda olardy 4:0 esebimen súrindirdi. Nátıjesinde óz tobynda 6 upaımen ekinshi orynǵa jaıǵasty.
Odan keıingi 2020/21 jylǵy maýsymda el quramasy sátsiz oıyn kórsetti. S lıgasynda tórtinshi topta oınaǵan qazaqstandyq fýtbolshylar syrt alańda Lıtvany 2:0 esebimen jeńip, olarǵa óz alańynda 1:2 esebimen ese jiberip qoıdy. Albanııamen elordada 0:0 esebimen teń oınap, syrt alańda olarǵa 1:3 esebimen jeńilip qaldy. Al Belarýske 1:2, 0:2 esebimen ese jiberdi. Saldarynan nebári 4 upaımen atalǵan topta kósh sońynda qalyp qoıdy. Odan keıin Moldovamen ótpeli oıyn ótkizdi. Syrt alańda moldovalyqtardy 2:1 esebimen tize búktirip, óz alańynda dál sol eseppen jeńilistiń aşy dámin tatty. Penaltı tebýde qazaqstandyqtar 5:4 esebimen basym túsip, S lıgasyndaǵy ornyn saqtap qaldy.
Endigi kezekte 2022/23 jylǵy maýsymda S lıgasy úshinshi topta synǵa túsýge múmkindik aldy. Atalǵan týrnırde el quramasy ázirge úzdik kórsetkishke qol jetkizdi. Alty kezdesýdiń tórteýinde jeńiske jetip, bireýinde teń oınasa, bireýinde qarsylasyna ese jiberdi. Aıta ketsek, Slovakııany 1:0, 2:1 esebimen tize búktirdi. Al óz alańynda Belarýsti 2:1 esebimen jeńse, syrt alańda 1:1 esebimen teń oınady. Ázerbaıjannan elordada 2:0 esebimen basym tússe, syrt alańda 0:3 esebimen jeńildi. Nátıjesinde atalǵan topta 13 upaımen birinshi oryn alyp, V lıgasyna joldama aldy. Sondaı-aq bul nátıjesi arqyly 2024 jylǵy Eýropa chempıonaty pleı-off satysynda Grekııamen oınap, olarǵa 1:5 esebimen jeńildi.
El quramasy V lıgasy úshinshi tobynda Norvegııa, Slovenııa jáne Avstrııa quramalarymen synǵa túsedi.
«Shynynda, V lıgasynda tájirıbeli quramalar synǵa túsetinin jaqsy bilemiz. Óıtkeni, olardyń keıbiri ótken maýsymda A lıgasynda oınasa, endigisi S lıgasynda biz sekildi úzdik nátıjege qol jetkizgen. Eshqaısysy qolda bar upaıyn eshkimge ustatqysy kelmeıdi. Atalǵan lıgadaǵy oıyndar bizdiń myqty jaǵymyz ben álsiz tusymyzdy kórsetedi. Qazaqstandyq fýtbolshylar Erlıng Holand pen Martın Edegor syndy juldyzdarǵa qalaı qarsylyq kórsete alady? Jankúıerler árbir kezdesýde óz quramamyzdan úzdik nátıje kútetini anyq», - deıdi burynǵy kásibı fýtbolshy Nurlan Ábýov.
Bas bapkerdiń qanshalyqty bilikti ?
Bıyl maýsym aıynda Qazaqstan quramasynyń bas bapkeri qyzmetine reseılik maman Stanıslav Cherchesov taǵaıyndaldy. Ol ulttyq qurama tizginin ustaǵan 18-shi bapker retinde erekshelenedi.
Stanıslav Cherchesov fýtbolshy mansabynda Reseıdiń «Spartak» (Ordjonıkıdze), «Spartak» (Máskeý), «Lokomotıv» (Máskeý) jáne Germanııanyń «Dınamo» (Drezden) klýbtarynda oınaǵan. Bapkerlik qyzmetinde Reseıdiń «Spartak» (Máskeý), «Jemchýjına», «Terek», «Amkar», «Dınamo» (Máskeý) syndy komandalarda eńbek etti. Sondaı-aq ol Reseı quramasy, Polshanyń «Legııa», Vengrııanyń «Ferentsvarosh» komandalarynyń bas bapkeri boldy. Bapkerlik mansabynda Reseı chempıonatynyń kúmis júldegeri atansa, Polsha chempıony, Polsha kýbogynyń jeńimpazy atandy. Oǵan Vengrııanyń eki márte chempıony jáne kýbogynyń ıegeri boldy. Reseı quramasymen 2018 jylǵy álem chempıonatynyń 1/4 fınalyna deıin jetti.
«Aldymyzda mańyzdy oıyndar bar. Biz sportshylarmyz. Jankúıerler senim artqannan keıin qolymyzdan kelgenniń bárin isteýimiz kerek. Ulttar lıgasynda aldymyzǵa úlken maqsat qoıamyz. Biz joq degende V dıvızıonynda qalýǵa tıistimiz. Biraq eń mańyzdy mindet – álem chempıonatynyń irikteý matchtaryna daıyndalý», - dedi Stanıslav Cherchesov bapkerlik qyzmettegi alǵashqy baspasóz máslıhatynda.
Tájirıbeli maman qazaqstandyq fýtbolshylardyń jaqsy nátıjege qol jetkizýne kúsh salady degen oıdamyz. Oǵan barlyq múmkindik bar. Onyń aıtýynsha, maqsat – maksımaldy nátıjege jetý.
«Biz endi S lıgasynda emes, V lıgasyndamyz, al qaǵaz júzinde qarsylastar bizden myqtyraq, muny moıyndaýymyz kerek. Erteń birinshi ári mańyzdy oıyn. Biz bárin basynan bastaımyz jáne Ulttar lıgasy arqyly álem chempıonatynyń irikteý kezeńine daıyndalýǵa bar kúshimizdi salamyz», - dedi Stanıslav Cherchesov keshe ótken baspasóz máslıhatynda.
Úmit kútken úzdikter kimder?
Reseılik bapker aldaǵy eki oıynǵa tájirıbeli fýtbolshylardy shaqyrdy. Olardyń arasynda jańadan qosylǵandar joq. Tek qaqpashylar qatarynda elordalyq «Jeńiste» oınaıtyn Temirlan Anarbekov qatarǵa qaıta qosylsa, shabýyl shebin Aıbar Jaqsylyqov («Qaısar»), Oralhan Ómirtaev (BATE, Belarýs), Ramazan Kárimov («Astana») nyǵaıta túsetin bolady.
Oıynshylardyń tizimi tómendegishe:
Qaqpashylar: Igor Shatskıı («Aqtóbe»), Aleksandr Zarýtskıı («Astana»), Stas Pokatılov («Tobyl»), Temirlan Anarbekov («Jeńis»);
Qorǵaýshylar: Sergeı Malyı («Ordabasy»), Roman Asrankýlov, Erkin Tapalov (ekeýi de – «Tobyl»), Aleksandr Marochkın, ıAn Vorogovskıı, Marat Bystrov (barlyǵy – «Astana»), Mıhaıl Gabyshev («Elimaı»), Álibek Qasym («Aqtóbe»), Nuraly Álip («Zenıt», Reseı), Lev Skvortsov («Shınnık», Reseı), Talǵat Kýsıapov («KAMAZ», Reseı);
Jartylaı qorǵaýshylar: Ashat Taǵybergen, Baýyrjan Islamhan, Aıbol Ábiken (barlyǵy – «Ordabasy»), Ramazan Orazov («Sılkeborg», Danııa), Arman Keńesov («Aqtóbe»), Baqtıer Zaınýtdınov («Beshıktash», Túrkııa), Abzal Beısebekov, Elhan Astanov (ekeýi de – «Astana»), Islam Chesnokov («Tobol»);
Shabýylshylar: Abat Aıymbetov («Adana Demırspor», Túrkııa), Aıbar Jaqsylyqov («Qaısar»), Oralhan Ómirtaev (BATE, Belarýs), Ramazan Kárimov («Astana»);
Aıta ketsek, atalǵan kezdesýde Baqtıer Zaınýtdınov taǵy bir márte gol soqsa, ulttyq quramanyń úzdik surmergeni kóshinde ózgelerden uzaı túsedi. Sondaı-aq Sergeı Malyı men Islambek Qýat jasyl alańǵa shyqsa, ulttyq qurama sapynda eń kóp oıyn ótkizgen fýtbolshylar tizimindegi kórsetkishin jaqsarta túsedi.
Eske salsaq, Ulttar lıgasyndaǵy Qazaqstan jáne Norvegııa kezdesýi qazaqstandyq ýaqytpen 19:00-de bastalyp, «Qazsport» telearnasynan tikeleı efırde kórsetiledi.
