Ulttar lıgasy: Qazaqstan elordada Moldovaǵa jol berdi
ASTANA. KAZINFORM - Búgin fýtboldan UEFA Ulttar lıgasy úshinshi týrynda Qazaqstan quramasy kezekti oıynyn elordada Moldovaǵa qarsy ótkizdi.
Kezdesý barysynda qarsylastar jyldam gol soǵýǵa tyrysty. Dese de birinshi kezeńniń sońyna deıin bir-biriniń qaqpasynan sańylaý taba almaı jatty. Oıyn barysynda moldovalyq fýtbolshylardyń belsendiligi baıqalyp turdy. Olardyń tarapynan kóbirek soqqy jasaldy.
Oıynnyń 45-mınýtynda Nıkı Kleşenko óz múmkindigin múlt jibermeı, Moldova quramasyn alǵa shyǵardy.
Ekinshi kezeńde moldovalyq Petrý Popeský 50-mınýtta esep aıyrmasyn qysqartsa, qazaqstandyq Nuraly Álip 64-mınýtta kózdegen nysanadan múlt ketken joq.
Osylaısha Qazaqstan quramasy qarsylasyna 1:2 esebimen jol berdi.
Qazirge deıin qazaqstandyq fýtbolshylar Ulttar lıgasynda Farer araldarymen 1:1 esebimen teń tússe, Slovakııaǵa 1:2 esebimen ese jiberdi.
Endi otandastarymyz aldaǵy oıynyn elordada 6 qazanda Farer araldaryna qarsy ótkizedi.
Eki qurama qazirge deıin jeti márte kezdesken edi. Onyń ishinde otandastarymyz tórt márte jeńiske jetip, bireýinde teń tússe, qalǵanynda qarsylasyna ese jiberdi.
Eske salsaq, budan buryn 2028 jyldan keıin UEFA Ulttar lıgasynyń formaty ózgeredi.
UEFA Atqarýshy komıteti Túrkııanyń Ystanbul qalasynda ótken otyrysynda erler arasyndaǵy ulttyq quramalarǵa arnalǵan týrnırlerdiń jańa tujyrymdamasyn maquldady.
Ulttar lıgasy men Eýropa chempıonaty irikteý kezeńiniń jańartylǵan formaty 2028 jylǵy qurlyqtyq dodadan keıin engiziledi.
