Ulttar lıgasy: Qazaqstan áıelder quramasy Lıýksembýrgke ese jiberdi

ASTANA. KAZINFORM — Fýtboldan Qazaqstan áıelder quramasy UEFA Ulttar lıgasynda búgin Lıýksembýrgpen kezdesý ótkizdi.

El quramasy Ulttar lıgasy S dıvızıony úshinshi tobynda synǵa túsip jatyr. Qarsylastary — Armenııa, Lıýksembýrg jáne Lıhtenshteın.

Qazir atalǵan topta bes týrdan keıin Lıýksembýrg 13 upaımen kósh basynda tursa, odan keıingi oryndaǵy Qazaqstannyń 10 upaıy boldy. Al Armenııa 6 upaı enshilese, Lıhtenshteınniń qorjyny bos.

Bul oıynnyń eki qurama úshin mańyzy zor edi. Jeńgeni aldaǵy maýsymda V lıgasynda baq synaýǵa múmkindik alatyn.

Kezdesý barysynda oıyn basynda qazaqstandyq qurama sapynan Qazyna Nurbaeva 5-mınýtta alańnan qýyldy. Ol qaqpashymen betpe-bet shyǵýǵa jaqyn qalǵan qarsylasyn qulatty. Soǵan qaramastan birinshi kezeńde qazaqstandyq fýtbolshylar alǵa qaraı umtyla tústi.

Nátıjesinde 15-mınýtta aıyp dobyn sheber oryndaǵan Kamıla Jumabaıqyzy óz quramasyn alǵa shyǵardy.

Ekinshi kezeńde lıýksembýrgtik fýtbolshylar úsh gol soǵyp ketti. Saldarynan Qazaqstan áıelder quramasy qarsylasyna 1:3 esebimen ese jiberdi.

Osylaısha Qazaqstan áıelder quramasy óz tobynda 10 upaı jınap, ekinshi orynǵa jaıǵasty. 

Al 16 upaı jınaǵan Lıýksembýrg óz tobynda birinshi oryn alyp, aldaǵy maýsymda V lıgasynda synǵa túsetin boldy.

Alǵashqy eki oıynda qazaqstandyq fýtbolshylar Armenııaǵa 0:2 esebimen jeńilse, odan keıin Lıýksembýrgpen 2:2 esebimen teń tústi. Al úshinshi týrda Lıhtenshteındi 4:0 esebimen tize búktirse, tórtinshi týrda Armenııadan 3:2 esebimen basym tústi.

Sondaı-aq 29 mamyrda el quramasy taǵy da Lıhtenshteındi 4:0 esebimen tize búktirdi.