Qazaqstan quramasynyń taǵy eki fýtbolshysy matchtarǵa qatysa almaıtyn boldy
ASTANA. KAZINFORM – «Astana» qorǵaýshysy Álibek Qasym men samaralyq «Krylıa Sovetov» klýbynyń vıngeri Islam Chesnokov jaraqatyna baılanysty Qazaqstan quramasynyń ÝEFA Ulttar lıgasyndaǵy aldaǵy matchtaryna qatysa almaıdy.
Qazaqstan fýtbol federatsııasynyń baspasóz qyzmeti málim etkendeı, Álibek Qasym 26 qyrkúıekte syrt alańda Farer araldaryna jáne 29 qyrkúıekte Slovakııaǵa qarsy ótetin matchtarda oınamaıdy.
Qorǵaýshynyń 2 qazanda Moldovaǵa jáne 6 qazanda Farer araldaryna qarsy óz alańymyzda ótetin keıingi kezdesýlerge qatysýy onyń jaraqatynan qalpyna kelý barysyna baılanysty sheshiledi.
Al Islam Chesnokov jaraqatyna baılanysty Qazaqstan quramasynyń aldaǵy tórt matchynyń barlyǵyn ótkizip alǵaly tur.
Qazaqstan quramasy eki fýtbolshyǵa da tezirek saýyǵyp, alańǵa oralýyna tilektestik bildirdi.
Aıta keteıik, Qazaqstan quramasy jańa bas bapker Djon van ’t Shıptiń jetekshiligimen Ulttar lıgasynyń kúzgi kezeńin bastaıdy. Qazaqstan quramasy S3 tobynda Slovakııa, Moldova jáne Farer araldarymen birge óner kórsetedi.
Qazaqstan quramasy alǵashqy matchyn 26 qyrkúıekte syrt alańda Farer araldaryna qarsy ótkizedi.
Buǵan deıin jaraqatyna baılanysty aldaǵy matchtarda ulttyq quramaǵa Anglııanyń «Bernlı» klýbynda oınaıtyn Dastan Sátpaevtyń da kómektese almaıtyny belgili bolǵan edi.
Sonymen qatar Ázerbaıjannyń «Sabah» klýbynda oınaıtyn 33 jastaǵy qaqpashy Stas Pokatılov ulttyq qurama sapyna qosyldy. Qaqpashy uzaq úzilisten keıin ulttyq komanda ornalasqan jerge qaıta oralyp, Ulttar lıgasynyń aldaǵy kezdesýlerine daıyndyqqa qatysady.
