Ultyna qorǵan bolǵan erjúrek jaýyngerlerdiń esimin urpaq jadynda saqtaýymyz kerek — Prezıdent
ASTANA. KAZINFROM — Prezıdent memlekettik marapat jáne áskerı shen tapsyrý rásiminde sóz sóılep, erlik eshqashan eskirmeıtinin aıtty, dep habarlaıdy Aqordanyń baspasóz qyzmeti.
Onyń sózinshe, Bahadúr babalarymyz rýhy asqaq, namysy bıik ekenin eren erligimen dáleldep keldi.
— Dańqty erlerimiz Ekinshi dúnıejúzilik soǵys kezinde qaıtpas qaısarlyqtyń ozyq úlgisin kórsetti. 500-ge jýyq jerlesimiz Keńes Odaǵynyń Batyry atandy. Alaıda, kóptegen maıdangerdiń erligi elenbeı qalǵany da jasyryn emes. Ultyna qorǵan bolǵan erjúrek jaýyngerlerdiń esimin urpaq jadynda saqtaýymyz kerek. Bul — bizdiń perzenttik paryzymyz, — dedi Prezıdent.
Qasym-Jomart Toqaev osy oraıda otandasymyz Kenjebaı Mádenovtiń erligin erekshe atap ótti.
— Uly Otan soǵysynyń sońynda ol vzvod komandıri retinde qandykóılek joldastarymen birge Berlınniń Ratýsha ǵımaratyna Jeńis týyn ildi. Bul natsıstik rejımniń kúıreýin kórsetken, maıdangerlerdiń rýhyn kótergen, shabýyldy odan ári údete túsýge dem bergen sát edi. Onyń qaharmandyq joly týraly marshal Georgıı Jýkov jáne basqa da myqty qolbasshylar, sondaı-aq jeńispen aıaqtalǵan qandy shaıqas jóninde qalam terbegen jýrnalıster de jazdy. Ókinishke qaraı, bul tarıhı mán-mańyzy aıryqsha dańqty erlik osy kezge deıin laıyqty baǵasyn alǵan joq. Sondyqtan men Uly Otan soǵysynda kórsetken janqııarlyǵy men batyldyǵy úshin marqum Kenjebaı Mádenovke «Halyq qaharmany» ataǵyn berý týraly Jarlyqqa qol qoıdym. Osylaısha, biz búgin bir el bolyp tarıhı ádildikti qalpyna keltirip otyrmyz, — dedi Memleket basshysy.
Eske salsaq, búgin Prezıdent soǵys ardageri Kenjebaı Mádenovke «Halyq qaharmany» ataǵyn bergenin jazǵan edik.
