Ultym orys bolǵanymen, men qazaqtyń kelinimin – Elena Strebkova
TÚRKІSTAN. KAZINFORM –Túrkistanda «El baqyty – eńbek pen birlikte» taqyrybynda Túrkistan oblystyq Qazaqstan halqy Assambleıasynyń HHVI sessııasy ótti. Onda qazaq otbasyna kelin bolyp túsken orys qyzy kópshilik aldynda sálem salyp, aqsaqaldardyń batasyn aldy.
Sessııaǵa Qazaqstan halqy Assambleıasy tóraǵasynyń orynbasary – Assambleıa hatshylyǵynyń meńgerýshisi Marat Ázilhanov, Túrkistan oblystyq máslıhatynyń tóraǵasy Nuraly Ábishov, sondaı-aq Qazaqstan halqy Assambleıasy keńesiniń músheleri men oblystyq máslıhat depýtattary jáne etnomádenı birlestikterdiń jetekshileri men músheleri qatysty.
Sessııa barysynda Túrkistan oblystyq slavıan etnomádenı birlestiginiń múshesi Elena Strebkova sóz sóılep, óńirde memlekettik tildiń qoldanys aıasyn keńeıtý boıynsha mazmundy baıandama jasady.
«Ultym orys bolǵanmen, men qazaqtyń kelinimin. Sondyqtan qalyń eldiń aldyna shyqqan soń qazaqtyń salty boıynsha sálem salý – kelindik mindetim, qurmetim. Al úlkenderdiń, halyqtyń batasyn alý – men úshin mártebe», - degen ol úlken zalda kópshilikke ıilip sálem berip, qoshemetke bólendi.
Elena Kentaý qalasynda turady. Taldyqorǵan qalasynda týylǵanymen, Kentaýǵa kelin bolyp túsken. Qazir qaladaǵy ıÝ.Gagarın atyndaǵy №16 mektep-gımnazııasynda aǵylshyn tili pániniń muǵalimi. Joldasy Nursultan – úıdiń eń kenjesi bolǵandyqtan, qarashańyraqta qalǵan. Búginde ata-enesimen birge turatyn orys qyzy kúndelikti kelindik mindetin abyroımen atqaryp keledi. Tańerteńmen sálemin salyp, qarııalardyń sháıin daıyndaıdy. Baýyrsaq pisirip, beshmarmaq jasaıdy. Úsh qyz ósirip otyrǵan jas otbasy salt- dástúr men ádep-ǵurypty da berik ustanady.
«Qazaq áýletine kelin bolyp tabaldyryq attaǵan kúnnen bastap enem ózi bas-kóz bolyp, qazaq halqynyń salt-dástúrin, ádep-ǵurpyn úıretti, qazaqy tárbıege baýlydy. Qazaq otbasyna kelin bolyp túsýim de qazaq tilin tereńdeı meńgerýge septigin tıgizdi. Elimizdiń árbir azamaty memlekettik tildi meńgerip, erkin sóıleı alsa, onyń artyqshylyǵy joq dep oılaımyn. Bul - óziń ómir súretin elge degen qurmettiń belgisi. Sondyqtan memlekettik tildi úırený – ár qazaqstandyqtyń azamattyq paryzy dep esepteımin», - dedi Elena.
Sessııa májilisinde «Ahyska» túrik etnomádenı ortalyǵy» qoǵamdyq birlestiginiń múshesi Venera Sarajova, Tólebı aýdandyq ózbek etnomádenı birlestiginiń múshesi Jamal Kadırov oblys kóleminde júzege asyp jatqan qaıyrymdylyq sharalary, memlekettik tildiń qoldaný aıasyn keńeıtý, medıatsııa jáne táýelsizdik jyldarynda Qazaqstannyń damýyna jastardyń qosqan úlesi jaıynda baıandama jasady.
Al, Túrkistan oblysy ákiminiń orynbasary Beısenbaı Tájibaev óńirde júzege asyp jatqan jumystar boıynsha aıtyp ótti.
«Qazaqstan halqy Assambleıasynyń «Júrekten – júrekke» aýqymdy aktsııasy aıasynda Túrkistan oblysy ıgi mıssııanyń kóshbasshysy boldy. Sý tasqynynan zardap shekken aımaqtarǵa túrkistandyq Assambleıa quny 150 mıllıon teńgege jýyq 630 tonnadan astam gýmanıtarlyq kómek jiberdi. Bul jumys áli de jalǵasýda», - dedi Beısenbaı Tájibaev.
Marat Ázilhanov taıaýda Memleket basshysy Qasym-Jomart Toqaevtyń tóraǵalyǵymen ótken Qazaqstan halqy Assambleıasynyń «Birlik. Jasampazdyq. Órleý» atty HHHІІІ sessııasynda júktelgen maqsat-mindetterge toqtaldy. Sondaı-aq, kúrdeli kezeńde tasqyn sýdan zardap shekkenderge kómek kórsetken barsha túrkistandyqtarǵa alǵys aıtty.
Sessııa májilisiniń sońynda etnosaralyq tatýlyq pen qoǵamdyq kelisimdi nyǵaıtýǵa qosqan eleýli úlesi úshin birqatar azamattar arnaıy marapatqa ıe boldy.
