«Ultaralyq tatýlyqtyń nyǵaıýy - Elbasynyń kóregen saıasatynyń jemisi» - grek etnomádenı birlestigi tóraǵasy S.Kosmerıdı

ALMATY. QazAqparat - «Qazaqstanda ultaralyq tatýlyqtyń nyǵaıýy - Elbasynyń kóregen saıasatynyń jemisi. Bul týraly búgin QazAqparat tilshisine Almaty q. «Eos» grek etnomádenı birlestiginiń tóraǵasy, shyǵys elderiniń Halyqaralyq sáýlet akademııasynyń akademıgi Spırıdon Kosmerıdı aıtty.

Onyń aıtýynsha, Qazaqstan halqy Assambleıasynyń XXI sessııasy Qazaqstanda ómir súrip jatqan barsha ulttar úshin shyn mánisinde merekege aınaldy.

«Bul sessııa Qazaqstan halqy Assambleıasyna aldaǵy atqaratyn jumystaryn aıqyndap berdi. Elbasy 2015 jyldy «Qazaqstan halqy Assambleıasynyń jyly» dep jarııalady. Bul ultaralyq qarym-qatynasty damytýda bizge júktelgen jańa mańyzdy jaýapkershilik dep bilemin. Sonymen qatar, Elbasy sessııada sóılegen sózinde elimizde etonomádenı birlestikterdiń odan ári damýy úshin, bir-birimen qarym-qatynasy nyǵaıa túsýi úshin úlken qalalarda, oblys ortalyqtarynda jańa etnomádenı birlestikterdiń ortalyqtaryn ashý kerektigin atap ótti. Endi mundaı ortalyq Almaty qalasynda da ashylar degen úmittemiz», - dedi Spırıdon Kosmerıdı.

Esterińizge sala keteıik, Spırıdon Georgıevıch Kosmerıdı basqaratyn «Eos» grek qoǵamy Almatyda sonaý 1989 jyly qurylǵan. Búginde atalmysh qoǵam Assambleıanyń barlyq sharalaryna belsendi túrde qatysatyn, memlekettik jáne ulttyq merekelerdi barynsha keń kólemde atap ótetin tanymal uıymdardyń biri. Onyń aralasýymen elimizdiń ár óńirinde 10 astam grek etnomádenı birlestikteri jumys istep keledi.